BMW X2 sDrive20iA M Sport X潮味混合體

寶馬（BMW）最近帶來全新車系X2，當中仲有個叫「M Sport X」的版本。X2 M Sport X？咩嚟（口架）？其實，這是一部玩Crossover Feel的小型SUV，而且整合了M Sport及X家族元素，唔止跑格中帶越野氣息，車身仲有金黃色揀，潮得來又前衞，係咪冇諗過SUV都可以玩到咁呢？

BMW X2 sDrive20iA M Sport X鬼面罩採用上窄下闊設計，充滿新鮮感。<br>售價：$469,000起

BMW X2 sDrive20iA M Sport X鬼面罩採用上窄下闊設計，充滿新鮮感。
售價：$469,000起

上窄下闊破格鬼面罩

BMW的X系列已誕生19年，車系由最初只有X5，發展到今日已有X1、X2、X3、X4、X5及X6（據悉年內仲有X7），全球累計銷量超過550萬部，可見SUV近20年個勢幾咁勁！本港開賣的X2為sDrive20iA，另有M Sport及M Sport X版可揀，性能、空間以至車價都一樣，邊部個樣合眼緣就落訂，唔使考慮咁多嘢。全新的X2擁有多項獨特設計特徵，譬如鬼面罩便破天荒採用上窄下闊設計，並於C柱加嵌寶馬廠徽，係咪諗起2000 CS及3.0 CSL呢2部經典BMW Coupes呢？至於今次拍攝的M Sport X版本，設計靈感就源自拉力賽車，頭泵把及車側等部分都加入了碳灰防刮飾件，將越野元素融合其中。

錶板首次使用Black Panel，顯得分外型格。

M真皮軚盤為標準配置，後方設有轉波撥片。

尾部設計不僅具跑味，而且十分潮。

內外展現跑車基因

X2 sDrive20iA M Sport X的操控同Compact Hatchback差唔多，而且設多項動態操控套件，如Performance Control及M Sport避震都是標準配備，車身高度亦比原來降低10mm，過彎靈敏度及穩定性都很出色。預載的行車模式亦提供ECO PRO、Comfort及Sport等多個選項，撳個掣就可改變車子個性。同時，廠方已將M尾翼、M軚盤及直徑達90mm的雙出排氣尾管列為標準配備，前排仲有採用Sensatec皮革跑車座椅，由內到外都展現出跑車基因，對年輕好動的一群應該幾有吸引力。

車身加入碳灰防刮飾件，看起來別具越野風格。

車廂的跑車座椅採用Sensatec皮革物料，並配上鋁質六角形格紋內飾板。

後座椅背可向前翻平，打通行李箱擴展載物量。

設備不俗慳油好力

X2雖是X系列的入門車系，但設備同樣有番咁上下水準，手機無線充電板、車廂氣氛燈（6色）、全景觀天幕天窗都可在車上找到，錶板更首次使用Black Panel，型格指數進一步飆升！事實上，X2不僅好玩有型，也具備不俗功能性，尾箱容量可透過扳平後座在470公升至1,355公升間靈活調配，地台板下另有儲物空間，足以滿足出行的戶外運動需要。由於輸港X2均為sDrive20iA，引擎清一色是2.0公升四缸渦輪增壓，192匹的最大馬力會透過七前速雙離合器波箱傳送至前輪，0~100km/h只需7.7秒，百公里綜合油耗更低至5.5公升，係咪好有衝動出車呢？