SS18男裝齊齊扮大叔
又到咗時裝人關注嘅SS18男裝潮流預告喇！先旨聲明：自從幾年前Normcore穿搭風格崛起以來，時尚界的反時裝運動一直火熱持續，到SS18更到達巔峰狀態；但凡昔日被視為老套或娘的Item和造型，都再度翻生，被時裝設計師千方百計融入設計中，甚至讓老爸、大叔成為潮界最紅寵兒。時裝潮流玩到咁，你說奇怪不奇怪？
Daddy Style就是王道
其實大叔造型也有一個文雅的名詞叫「Daddy Style」，即是老爸的造型，咁老爸通常又會着咩呢？其實就是一個阿叔會着的服飾！來年春夏無論BALENCIAGA、VETEMENTS抑或Martine Rose，都身先士卒投入這股熱潮中，以不合身的Cutting比例、功能至上的科技物料，甚至極不搭調的鮮色拼湊等，打造SS18最新男裝。總之過往一切被視為錯配的東西，都會一下子成為潮流，彷彿各大品牌都是齊齊「為怪而怪」似的。
Key Item 1 超闊長褸
這個於FW17已漸漸崛起的元素，主要以乾濕褸為主，精髓是長度要比一般長褸再長得多，肩膊線條亦要偏闊（有Shoulder Pads更佳），總之就是要Oversized到帶點不倫不類的感覺，其實都幾蝦人着，尤其是矮仔。
Key Item 2 大件過頭笠
大叔Style有一個特性，就是鍾意貪方便着過頭笠服飾。所以新季各大品牌也有許多相應Hoodie及Hiking Anoraks產品。而且跟長褸一樣，過頭笠服飾都以超Oversized剪裁為主，冇錢買貴Brands的朋友不妨到香港二、 三線商場的百貨公司尋找類同款式，反正唔排除BALENCIAGA設計總監Demna Gvasalia本身就係喺呢啲地方搵靈感。
Key Item 3 大叔波鞋
講咗不下幾十次，厚底、Hi-tech、外形「薯到爆」的「大叔波鞋」嚟緊一定要有，而環顧SS18的局勢，除了王道的Triple-S外，N。21、Pigalle及Gosha Rubchinskiy等品牌也會加入這股另類熱潮，相當熱鬧。不過提起這類大大舊嘅波鞋，最經典之選一定是Nike Air Max 95，你睇佢設計就知。
Key Item 4 腰Bag
係呀冇睇錯呀！係腰Bag呀！正是平時喺旺角見到小巴叔叔孭住喺肚腩仔或心口嗰啲呀！不過大家毋須太擔心，因為一眾時裝品牌推出的腰Bag，已經在物料、結構或外形上作出改裝，款式有番咁上下型的，所以當真配襯起來的時候，也未必如小巴叔叔嗰啲款咁難襯。
大叔 Style以外的潮流
當然，如果閣下自命年輕有型，唔想扮大叔的話，2018年春夏其實尚有其他潮流。Comme des Garçons Homme Plus就另闢蹊徑以閃色元素為主題，閃閃物料結合「姣屍扽篤」的鮮艷顏色，雖然係有型，卻也不見得比大叔Look更易配襯。
撰文：張榮熹
相片：互聯網