Fancy手機穩定器直播減震

近年唔少人鍾意喺facebook等社交平台玩直播，不過手持拍片容易手震，觀眾隨時睇到頭暈，呢個時候就需要手機穩定器。早前喺集資網大受歡迎、來自內地品牌Wewow嘅Fancy，號稱全球最細手機穩定器，長方形手柄僅長11cm及闊4cm，重量只有215g，放喺手袋都唔阻地方。而手機夾採用伸縮設計，可擺放闊度5.5~8.5cm嘅手機，換言之細至iPhone SE，大至Galaxy S8+都用到。用家只要將手機放上穩定器後開機，穩定器便會自動作水平校正，將手機垂直或水平保持3秒即可轉向。它內置2,600mAh電量，使用時間長達8小時，同時備有IP54防水防塵、LED自拍補光燈等，跟機仲附送一支長約70cm的伸縮桿，可安裝於Fancy底部，玩自拍更加方便。