BMW 520d Saloon - Sport出柴好時機

寶馬（BMW）新5系大玩科技，旗艦的540i M Sport固之然齊料，入門的520d亦同樣有睇頭，手勢操控、主動氣門控制（Active Air Stream）等全屬標準配置，好正？未算，環保署原定於今年7月1日起收緊新登記柴油私家車排放標準至LEV III的規例，將延後至10月1日生效，即係話嚟緊呢5個月仲有520d賣，想享受柴油的相宜價格及澎湃扭力，唔好錯過呢個出車時機喇！

BMW 520d Saloon - Sport
售價：$599,000

Sport Line版添跑化裝飾

本港有售的520d有2個版本，一款是基本版，另一款是Sport Line，後者多$3萬，軨大1吋、改用M Sport懸掛及加上跑化裝飾，精明消費者應該識揀。好多人都擔心柴油引擎較嘈，事實上只要隔音做得好，能傳進車廂的噪音及震動都不會特別明顯，就好似520d咁，怠速時跟汽油版沒多大分別，只靠聽聲來分辨汽/柴油引擎，途人應會清楚過乘客。本港的柴油零售價格遠低於汽油，雖然牌價相差不足$4，但計埋折扣優惠，實際上每公升可慳$5以上。據廠方提供的資料，全新520d的綜合百公里油耗僅4.1至4.5公升，假設用油卡入柴油每公升有$4折扣，即每公里燃油成本都係$0.3多啲！若用車哩數多，柴油的優勢實在難以抗拒。

錶板換上電子屏幕，顯示內容更加豐富。

Sport Line版本配上運動化真皮軚盤，並附設加減波按鍵。

後排空間跟上代差不多，乘坐質素相當不錯。

手勢控制極Hi-Tech

新5系的入場費高於上代，起錶價$56.9萬起，係咪代理「大咬」咗？那又不算，有時間落Showroom睇吓摸吓，就會感受到G30世代5系前所未有的豪華及科技感，都覺得值嘅。520d有個Option叫Technology Pack，當中包括咗電尾門、BMW Display Key、Comfort Access System及數碼化錶板Multifunctional Instrument Display，稅前只係$1.6萬，買得5系就唔好吝惜喇，成個錶板換上電子屏幕，介面靚、資訊又豐富，感覺正好多。同時，中控台設有10.25吋顯示屏，不但可觸控，亦支援Gesture Control，以往出現在7系的高階設備已下放至520d，駕駛者可用手勢隔空控制音響及通話系統。

黑色窗框是Sport Line的標準設備，顯得更富跑格。

娛樂及通話系統可用手勢操控，感覺頗為Hi-Tech。

選配BMW Display Key整合了觸控屏幕，可查閱汽車資訊。

主動氣門減風阻油耗

風阻影響到汽車的性能及油耗表現，為減低風阻，廠方特別為新5系加入主動氣門控制系統（Active Air Stream），設於前進氣格柵內的旋轉氣門可因應實際情況自動調校開合角度，引擎處於低負荷情況下會將格柵關上，實現同級中最低的風阻系數Cd0.22。今次測試的520d是Sport Line版，相對於標準車型，配胎由225/55 R17升級至245/45 R18，並換上M Sport懸掛、運動化真皮軚環及前座Sport Seats，配合車身上的亮黑飾件，成部車當堂多咗幾分跑格。揸開汽油私家車的朋友，未必對2.0公升Turbo柴油的性能有概念，不如畀幾個數據大家參考吓，520d的0~100km/h只需7.5秒，最大扭力達到400Nm，係咪堅先？