White Day必學！iPhone影女7式
相傳3月14日白色情人節，女神會回禮畀眾兵以示獎勵，喺依個時候如果男士識得拎部iPhone嚟影相呃Like，肯定會成為加分位。不過影相話難唔難，話易唔易，一於請專業攝影師Wilson C.教路，利用iPhone加幾件小道具影人像沙龍，趁住White Day嚟個速成班影靚相啦！
第一式：約會揀Magic Hour
想影靚相，拍攝時間和氣氛最為重要。Wilson表示︰「影人像沙龍最好揀下午3時或4時後，一來光線比正午較為柔和，Model雙眼唔會睜唔開，二來影出來嘅輪廓會深啲；另可影一些背光相突出線條，勾畫剪影更清楚。」
第二式：唇彩添浪漫
女仔實有唇彩跟身，只要輕輕塗於iPhone鏡頭，便能為相片添加顏色濾鏡，營造浪漫氛圍。Wilson指，此方法能節省後期製作工夫，而且顏色可隨時變化。若用埋iPhone 7 Plus內置的人像模式，便能突出人物立體感。不過他提醒，切勿用指甲油代替唇彩，否則顏色太濃容易損壞鏡頭。
第三式：萬字夾加色
iPhone鏡頭較細，滴唇彩容易把整個畫面遮蔽，改用萬字夾於鏡前晃動，便可令顏色局部出現於某個地方，變化更大。Wilson指，紅、黃、紫、綠、藍色萬字夾均有不俗效果，但辦公室常見的銀色萬字夾由於顏色唔突出，就不建議使用了。
第四式：膠袋玩疊影
雖然iPhone的Live Photos支援動態拍攝功能，但除咗記錄動作，就未能加入其他特效。Wilson教路，拍攝Live Photos時可用透明膠袋遮蔽鏡頭，配合前後晃動，就能拍出疊影柔焦效果。惟拍攝時要控制失焦程度，膠袋愈近鏡頭，影像愈模糊，兩者距離要恰到好處。
第五式：鏡子做倒影
倒影是常用構圖技巧之一，一般可借助水漥、海邊或落地玻璃做到。若然身邊沒有這些景物，其實用女士隨身的化妝鏡也可以。只需將化妝鏡放於手機鏡頭旁，就可將女神樣子投射到畫面另一邊，使左右臉同時入鏡。留意主體處於順光或側光時為最佳拍攝時機，影到靚相嘅機會大增。
第六式：置中變長腿
唔少女仔鍾意影「V煞臉」，但高角度取景有機會令雙腿變短。Wilson教路，以低角度拍攝時將人物臉部擺於畫面稍稍置中，便可瘦臉同時將雙腿拉長；若再加上iPhone 7 Plus的廣角鏡頭及Live Photos功能，拍攝時輕晃雙腳，美腿即時變得又長又有動感，十足九頭身美女。
第七式：燈箱補光
iPhone 7 Plus的人像模式雖然可拍出前清後矇效果，但很多時要光源充足下才能影到，在晚上或室內等環境，便要為人像補光。Wilson指可利用鬧市或商場的廣告燈箱及霓虹光管幫手，先叫對方靠近光源，待有充足照射下再開啟人像模式，自然能拍出淺景深靚相。
撰文︰陳志滔
攝影︰郭凱敏