PS VR來襲！跑車喪屍殺埋身
光天化日竟有喪屍突襲，未到萬聖節已經咁猛鬼？睇真啲原來係PlayStation VR（簡稱PS VR）試玩活動。全城期待嘅虛擬遊戲裝置PS VR，將於10月13日凌晨零時在香港開賣，小記就踩入首賣試玩會現場，搶試賽車遊戲《DRIVECLUB VR》及驚慄大作《Resident Evil 7》，以及搵吓有乜開賣優惠詳情。
試玩《DRIVECLUB VR》及《Resident Evil 7》
相信很多機迷喺入手PS VR之前，都想親身體驗一下這個眼罩有幾好玩。依家終於有機會，由即日起至10月21日於尖沙咀一個大型商場將有試玩活動，場內設置了4個VR主題體驗區，讓各位玩盡不同類型遊戲，簡單如《The PLAYROOM VR》扮怪獸去躲避投擲攻擊。不過最吸引梗係可坐上駕駛座，模擬駕駛賽車享受《DRIVECLUB VR》的飆速快感。另一焦點係驚嚇度爆燈嘅《Resident Evil 7》，玩家可試玩最新「The Kitchen」部分，要從陰森破舊的民居逃跑，動漫節目主持紫龍試玩後都話猶有餘悸：「探索時背景的叫聲和腳步聲營造出逼真恐怖氣氛，女村民從暗角撲出一幕真係嚇到趴埋牆！」
首賣日買機送木架
今次廠方於10月13日凌晨零時舉行午夜首賣會，即場發售100套「PlayStation VR攝影機同捆裝」（售價：$3,480），買家可獲贈全人手雕刻的Start From Zero雕刻木架，喺屋企擺放PS VR更加有型。此外，10月13日起全港Platinum Shop及Sony Store、官方網店會同步開售PS VR。若玩家想連同PS Move動態控制器一併購買，亦可選擇廠方與LOG-ON合作推出的「PlayStation VR All-In-One同捆裝」（售價：$3,980），當日會先喺葵芳及觀塘分店開售。其後11月1日及11月22日將分別於銅鑼灣及九龍塘分店限量發售，想入手就要留意！
首賣活動詳情
時間：10月13日（星期四）凌晨零時
地點：尖沙咀彌敦道100號The ONE地下露天廣場
名額：100名
備註：首賣PlayStation VR攝影機同捆裝，將附送Start From Zero雕刻木架，只接受現金交易。試玩會即日起至10月21日12:00nn~10:00pm開放。
首發遊戲推介
廠方喺首賣日後，同期會推出32款PS VR內容，包含休閒遊戲、360度影片等，讓玩家獲得全新虛擬體驗，當中推介《Battlezone》及《RIGS Mechanized Combat League》。
5分鐘完成安裝
小記搶先將PS VR「開箱」，起初都擔心組裝眼罩和駁線會好麻煩，後來發覺只要跟足標示順序駁線，先將本來連接PS4和電視的一組HDMI端子，分接到PS VR處理器盒子，再將VR眼罩的HDMI和AUX雙插頭連接到盒子，基本上5分鐘左右便可完成安裝。大前提是要騰出一個長3米、闊1.9米的遊玩空間，然後讓PS Camera設於跟玩家水平位置，事關要靠它偵測VR眼罩的LED定位及感應動作。
撰文：廖俊斌
部分攝影：胡振文