雷射槍War Game旺角螢格開戰

白雲：「吓？被BB彈射中又紅又腫，唔使預我啦！」

阿一：「今次玩雷射槍，打中咗只會着燈兼響聲，一定唔會痛。」

陶枳樽：「但係地點咁隔涉，想玩完再食Tea兼落街Shopping唔夠時間喎。」

鄺芷凡：「最近喺旺角開咗間雷射槍射擊場ResaLaser，地點就腳之餘，仲有唔少藝人撐場！」

戰場貼上許多螢光條，並有不少隱蔽窗戶，一不留神隨時被對手偷襲。	要善用牆壁作掩護，但由於槍頭有感應器，不宜伸出槍頭「撩槍」。	穿上感應背心及拎起雷射槍便可進入戰場，背心胸前及背後均設有感應器。
進入夜光戰場前，先要到亮起藍燈的裝備室穿上裝備。	當用完一排「彈藥」後需要Reload，卡卡聲甚有真實感。	雷射槍頭都有一個感應器，射人時亦容易被其他對手射中。

阿一：「戰場仲用晒螢光布置，男女都啱玩，一於齊齊落場大展身手！」

Laser Tag翻叮熱潮

潮流呢家嘢其實不斷輪流轉，雷射槍射擊遊戲Laser Tag早於30年前面世，至早年喺香港再受重視。新開業嘅ResaLaser將之前登陸美國同台灣嘅雷射槍遊戲帶到香港，最特別是用上原創147-NSLT系統裝備，據負責人講，傳統Laser Tag只會用上紅外線槍，亮度較高且容易傷眼，今次嘅槍則用光度較弱嘅雷射光，較為安全！現場備有多種射擊玩法，好似分隊殲滅戰、個人戰、首級行動、爭奪戰及攻防戰等，最多可供12人分成兩隊同場較量。

射中感應器得分

咁點樣得分獲勝呢？傳統室內War Game，玩家中槍後便要離場或等候救援，但ResaLaser雷射槍嘅玩法大有不同，玩家打中對方身上嘅感應器即可得分，但被打中者唔使扮死離場，即時可反攻追射對方，增加刺激程度。新場所用的147-NSLT系統，設有一支雷射槍，槍頭位置備有感應器，而每位玩家都要穿上前後各有兩個感應器的背心，打得中其中一個感應器就可得分，系統會好似打機咁自動記錄每個玩家射槍、命中及被射等數據，最過癮係當一排「彈藥」用完後，便要手動自行Reload，好似試玩時打得最好嘅阿一，命中率只係得5%。

螢光場景Cyber

無論任何War Game都好，場景設計非常重要，由於ResaLaser位處旺角，佔地難以同其他工廈相比，因此「戰場」花盡心思，將場地燈光調暗，並於牆壁貼有大量螢光裝飾，還不時會大放煙霧，Cyber之餘感覺神秘，唔易發現敵人。而且在牆壁邊緣及窗口位置都包上防撞膠，以策安全，負責人仲話會不定期換上新場景。而雷射槍戰都有好多戰術用來獲取高分，如團隊諗計包抄，或者安排狙擊手匿在暗角伏擊，因為每節20分鐘內不斷走、走、走其實都幾攰！

同場加映：台灣147槍樂園 主題設計

雷射槍射擊遊戲在台灣已流行多時，其中147槍樂園係比較出名嘅一間，香港ResaLaser都以此為借鏡。當中「雷射槍對抗館」場景設計較着重主題，台北用上中東城市背景，最多可容納22位玩家作戰；高雄則設置成市區街景，並以殲滅毒梟為前提作戰，提升玩家的投入感。

活動詳情

地址：旺角亞皆老街24~26號東方大廈8樓

收費：每位$118/節（非會員）

每位$98/節、每位$158/2節（會員）

每位$60/節、每位$100/2節（學生）（學生優惠時段為星期一至五12:00nn~7:00pm，公眾假期除外）

備註：每節20分鐘，每場人數最多12人

網址：http://resalaser.com.hk

撰文：布偉倫

攝影：胡振文