潮玩GR II Wi-Fi抓拍唔靠App

一代潮機Ricoh GR系列，初代獲得不少潮人追捧兼讚好，作為二代目嘅GR II，雖然外形設計變化唔大，沿用28mm F2.8定焦鏡頭，但加入了大熱的Wi-Fi功能，用家毋須裝App便可透過手機遙控操作及傳送影像，加上機身便攜啱晒出街Snapshot。

售價：$6,290（普通版）、$7,290（城市皮革限量版套裝）

瀏覽器遙距操作

今時今日差唔多部部相機都玩Wi-Fi，方便將相片擺上網博Like。縱使GR系列喺呢方面起步較遲，但遲到好過冇到，終於在GR II加入Wi-Fi功能，配合手柄的NFC晶片便可一拍連接手機，又或者長按機旁的Effect鍵便可開啟Wi-Fi功能。唔少相機都要透過手機App方可遙距操控，新機醒目之處是唔使靠App，只需利用瀏覽器連接官網的GR Remote工具便能做到，介面清晰之餘反應夠快，只是首次連線要輸入網址較繁複，之後便可經標籤網址一按即入。

引入6種新效果

唔少人影相鍾意加入濾鏡點綴，令作品變成復古、黑白等效果，新機特別增設清晰、光亮、鮮明、人像、風雅和HDR色調6款效果模式，加埋原本的效果共有17款咁多。當中HDR色調最值得推介，能提高影像動態範圍，仲可加入黑角效果，影出來幾有油畫Feel。機頂還提供閃光燈和Hotshoe插座，能夠安裝閃光燈或觀景器等配件；機身另設有兩個自訂鍵，讓用家自行設定各種功能。

城市皮革限量版套裝的機身用上綠色接環，且附送相機皮套及皮革手帶。

轉盤備有安全鎖以防誤轉，並提供多種進階曝光模式。

背面按鍵鋪排跟上代一樣，GR粉絲可以快速上手。

APS-C感光元件

GR II定價六七千元雖然有點貴，但其規格卻拍得住單反，不僅採用鎂合金機身，而且備有1,620萬像素的APS-C感光元件及28mm定焦鏡頭，配合高性能的GR ENGINE V影像處理器，影相追焦手到拿來，還支援1,080p拍片畫質，無論影相或拍片都咁勁。此外，新機推出了城市皮革限量版套裝，跟普通版的分別在於套上綠色接環，跟機更附有相機皮套及皮革手帶，潮味更濃。

用上28mm定焦鏡頭，配合F2.8大光圈Snapshot一流。	頂部設有內置閃光燈，同時提供Hotshoe方便加入觀景器或閃光燈等配件。	效果模式共有17款咁多，當中清晰、光亮、鮮明、人像、風雅和HDR色調為新增效果。
GR II唔單止影相掂，拍片一樣得，支援1,080@30fps全高清影片質素。	手機毋須裝App，只要開啟瀏覽器連接官網GR Remote工具便能遙距操作。	試相區以新增的HDR色調模式拍攝，其高動態範圍令細節盡現，加上1,620萬像素畫質成像細緻又銳利。