進擊之巨球 Kin-Ball
唔少人細個都玩過數字球，原來其變種「加大版」嘅Kin-Ball，喺歐美相當流行，仲發展成國際賽事。這項新興嘅團體運動，用上直徑超過1米嘅橡膠波作賽。咁大個波當然唔係畀進擊之巨人打，主要靠4名玩家組隊合作控波擊球，由3隊同場較量！依家想玩唔使飛去外國咁遠，皆因Kin-Ball今年正式引入香港，男女老幼都可一展身手！
4呎直徑橡膠波
數字球嘅玩法相信唔使詳細介紹，簡單嚟講係一人叫號碼拋波，被叫中嘅玩家要衝去接波。而源於加拿大魁北克的Kin-Ball，玩法都幾似數字球，但以顏色取代號碼，加上比賽用的膠波直徑有4呎（約1.22米），叫佢做加大版「顏色球」更貼切！規例方面，正式比賽要於20米乘20米的場地進行，分為3隊、每隊4人在場內作賽。當一方叫出顏色並擊球後，穿上那種顏色的隊伍便要上前接波，接波後有20秒時間組織攻勢；若接唔到波的話，另外兩隊即可得分。每場比賽分3節，每節約10分鐘，中間可休息2至3分鐘。另一規則是每次擊球前要以英文叫出「Omnikin」，加上球衣顏色如黑（Black）、灰（Grey）、粉紅（Pink），除了顏色易分辨外，單音節字亦冇咁易叫錯。
3人持球做炮台
Kin-Ball喺擊球時幾着重技巧，要由3位隊員控定橡膠波，然後由另一位隊員擊球。擊球動作因人而異，但一定唔可以向下，並且最短距離要1.8米，當然最理想是水平擊球，減少對手接波時間。以初學者為例，兩隻手掌交疊然後以雙手擊球會較易控制，手法似打棒球多過打排球，如玩得勁的話單手擊球都得。3位隊員控球時亦有學問，最基本的Triangle陣式是3位球員單腳跪下、手掌向上平放、面向下並以等邊三角位置持球；較難掌握但可令擊球路線較直較快的是Corridor，排陣是一邊兩人、一邊一人，但練熟基本功之前切忌亂試。
20秒時間任玩戰術
始終比賽場地咁大，要防守都唔易，4名隊員建議企喺四角，就算擊球飛向哪一個方向都有機會接到。但要靠一人之力接住超過1米直徑嘅巨球都幾難，所以正式玩時可用身體任何部位將膠球擋高，其他隊友便有時間過嚟幫手擺陣。如果想運球到有利位置的話，就只容許最多兩人同時運球，一有第三者持球時就唔郁得，由第一下觸球到完成攻勢只得20秒，要睇時間做人呀！Kin-Ball運動少身體接觸，基本上大人、小朋友、男女都可以一齊玩，但玩時有個不明文規例就係唔會叫最低分嗰隊，令成個比賽更緊湊，同時所有玩家都可以Enjoy遊戲。
Kin-Ball知多啲
Kin-Ball最初於1986年在加拿大魁北克發起，之後推廣至美國、比利時、法國、瑞士、西班牙等地，至今已有十幾個國家超過400萬人參與這項運動，仲會搞Kin-Ball世界盃。好似今年8月在西班牙舉行的「Kin-Ball Sport World Cup 2015」，吸引了12個國家嘅男女子代表隊包括中國、日本、韓國等參賽。
入門課程推介
這項屬於新引入香港的運動，暫時只有由Kin-Ball Hong Kong Association主辦及Awesomer提供相關教學課程，只要年滿8歲及有12人以上報名即可開班，在初級課程中可學習基本規則及技巧，有興趣的話仲可報讀高級課程。主辦單位話想透過課程挑選有潛質的人士代表香港打國際賽！
初級課程
簡介：導師教授簡單理論，配以遊戲及比賽，令學員享受Kin-Ball的樂趣及學習相關技巧。
時間：2小時
人數：12人以上（必須為8歲以上）
費用：$2,700（不包場地）、$3,500（包場地）
網址：www.awesomer.com.hk
撰文：布偉倫
攝影：謝孝祥（部分相片由受訪者提供）
模特兒：Candy Wong