8吋板王 效能對決
新推出嘅iPad Air 2靚就靚啦，但係9.7吋芒對習慣單手揸機嘅人士，拎出拎入始終唔係咁方便，所以機Gor對iPad mini 3興趣大啲，話晒有土豪金色和Touch ID。
不過腦場嘅老友話近排8吋Tablet空群而出，想換機其實有好多選擇，仲借咗部新簇簇嘅Lenovo YOGA Tablet 2畀機Gor玩，大讚佢聲畫出色。今次一於拎兩款新機對決，睇吓邊部先至係終極8吋板王！
YOGA Tablet 2多種操作模式
傳統Tablet多以平面方角設計，但新落場嘅Lenovo YOGA Tablet 2，機側多了一條圓柱體，除了令單手拎機更穩陣外，仲可拉出機背支撐架，放喺枱面睇片甚至掛喺牆上使用，最啱畀女友掛喺廚房，上網邊睇食譜邊煮嘢食。機Gor發現圓柱體手把另一優點係可裝設高容量電池，令操作時間可延長至18小時，而且玩埋LTE上網定價都係$3,499，價錢都幾吸引。
規格表
處理器：Intel Atom Z3745
屏幕：8吋（1,920×1,200解像度）
鏡頭：（前置）160萬像素、（後置）800萬像素
儲存空間：16GB
作業系統：Android 4.4
體積：148.9×210×2.7~7mm
重量：419g（Wi-Fi版）、429g（LTE版）
iPad mini 3追加Touch ID
對比上一代，iPad mini 3嘅變化唔算大，主要係將Touch ID加入Home鍵，開機解鎖、上iTunes Store畀錢時，用手指一掃就搞掂。另一新元素係有得揀土豪金色機身，啱晒機Gor口味。最正係上Apple Store落「柯打」24小時就出貨，心急的話仲可透過iReserve及直接落舖買，唔使好似iPhone咁捱炒價。場內老友透露，上代iPad mini 2有唔少人追捧，皆因定價減至$2,288起，但機Gor玩Gadget梗係要買最新啦！
規格表
處理器：A7+M7
屏幕：7.9吋（2,048×1,536解像度）
鏡頭：（前置）120萬像素、（後置）500萬像素
儲存空間：16GB、64GB、128GB
作業系統：iOS 8.1
體積：134.7×200×7.5mm
重量：331g（Wi-Fi版）、341g（LTE版）
鬥睇片質素
牌面上，YOGA Tablet 2用上8吋全高清屏幕，而iPad mini 3配上7.9吋2,048×1,536解像度Retina屏幕，單睇解像度以後者較強。但實際睇片時，YOGA Tablet 2的色彩層次更鮮艷，加上屏幕採用16:10畫面比例，無論播放高清片或相片時，顯示面積都比iPad mini 3更大；而且內置喇叭亦較好聲，先贏一仗。
鬥輕薄手感
薄同輕絕對係揀平板嘅考慮因素，YOGA Tablet 2機身最薄處只有2.7mm，但由於機側加上一條圓柱體手把，令整體變得笨重，雖然直度單手揸機嘅手感幾好，但放入袋時便會拱起一舊。反觀iPad mini 3維持一貫靚仔造型，加上佢最輕只有331g，比YOGA Tablet 2的419g輕近兩成，呢方面優劣立見。
鬥效能跑分
以軟件跑分比試效能，某程度會較為客觀。雖然兩款平板分別用上Android 4.4及iOS 8.1作業系統，但仍可透過新版《AnTuTu》跑分作參考。YOGA Tablet 2跑出32,710分，而iPad mini 3則獲得34,812分，兩者最大差異係來自3D Graphics表現，前者只有5,977分，後者則達9,038分，代表處理圖像如玩複雜的3D遊戲時，iPad mini 3會比較流暢。
達人教路
科技專欄作家鍾偉民（Ray）：「按需要而選擇！」
「市場上的8吋平板主要分為iOS、Android及Windows三大陣營，它們各有優劣之處，例如想將檔案抄落iPad會較麻煩，但iOS勝在Apps多，單係專為iPad而開發的應用程式就超過60萬個。Android平板嘅Apps大部分是將手機版本放大，並非專為平板而設計，但好處是將PDF、影片等抄落平板時較方便。至於Windows平板嘅定位在兩者之間，會傾向工作性能方面，用家要按自己需要而抉擇。」
果迷必捧iPad mini 3
iPad mini 3在硬件性能及輕薄手感較為優勝， YOGA Tablet 2在屏幕質素及操控體驗亦下了不少苦功，而且定價仲要平幾舊水，揀邊部係8吋板王確實幾難。如果問機Gor自己會買邊一部呢？咁一定會揀土豪金iPad mini 3，皆因自己用緊上代iPad，過資料容易啲之外，仲可襯番部土豪金iPhone 6。而且Apple Gadgets嘅二手價一向企得幾硬，玩厭咗放出去都容易啲啦！
Profile
機Gor
機不離身，不信Spec只信測試，不扮高深，懶理低俗，貪新不忘舊。
撰文：機Gor
查詢電話：（a）2516 3938、（b）800 908 988