HERO4踩板飛躍拍得更Pro

十個X-Game發燒友，有九個用GoPro拍片，藉此記錄動感畫面。近期GoPro推出新一代HERO4系列，大玩4K超高清拍片功能。為了測試新機有幾勁，今次搵來香港滑板運動代表俊仔，喺室內滑板場率先試拍，順便傳授各位一些花式拍片技巧，齊齊體驗GoPro的「攝」人魅力。

利用自拍棍一邊踩板一邊自拍，便可拍出主體表情。

HERO4 Black 4K流暢畫質

近年興起Action Cam，當中以GoPro發展得最成熟，上代HERO3系列已開始玩4K功能，惟不少專業玩家嫌佢只得每秒15格未夠靈敏，新一代HERO4自然大革新。新系列分為HERO4 Black和HERO4 Silver兩款型號，定位較高的HERO4 Black提供4K@30fps、2.7K@50fps及1,080p@120fps等拍片功能，畫質與流暢度兼備；至於HERO4 Silver擁有4K@15fps、2.7K@30fps及1,080p@60fps等設定，針對主流拍片用家。俊仔指：「雖然4K畫質勁靚，但要影滑板等X-Game運動，會着重格數為先，傾向使用1,080p@120fps，方便剪片時玩慢動作效果。」

HERO4 Silver篤芒即拍即睇

齋睇規格，正路都會揀高階嘅HERO4 Black，不過只要反轉機背，便會發現較平嘅HERO4 Silver首次植入觸控屏幕，讓用家篤芒設定Menu，仲可實時預覽和重播影片。曾用過HERO2、HERO3嘅俊仔笑言：「我自己部HERO3都專登加咗個LCD Touch BacPac外置芒，方便拍片時取景，又可以即時睇番拍成點。要讚嘅係HERO4 Silver篤芒反應靈敏咗好多，最正係隔住個殼都篤到，而且可以慳番幾舊水買外置芒，我自己就鍾意HERO4 Silver多啲。」

香港滑板運動代表俊仔，多年前已用Action Cam拍片。	加建防水殼既支援防撞，同時可潛入40米水深，上山下海靠晒佢。	用上全新1,160mAh專用電池，可以捱得耐啲。
用腳架Set定鏡頭記錄踩板花式，有助改善動作。	HERO4 Black和HERO4 Silver從正面睇完全冇分別，前者支援4K@30fps拍片，後者則配備觸控屏幕。售價：$4,300（HERO4 Black）、$3,450（HERO4 Silver）	新增QuikCapture模式，按機頂按鍵即可開機兼拍片，長按兩秒便能拍下Time Lapse。

收音動態範圍倍增

值得一提，兩機嘅收音效果比以往提升咗兩倍動態範圍，音色既清晰又有現場感，當中HERO4 Black更具備複合類比數碼轉化器，支援外加專業收音咪，配合減噪技術，就算高速踩板時嘅聲效都記錄得一清二楚。俊仔表示：「我哋平時拍片都盡量唔加殼，驚收唔到音，條片拍出來冇聲會好悶，而新機嘅收音明顯強好多，隔好遠都聽到塊板嘅落地聲。」此外，兩機還備有不少功能，包括能連拍30張1,200萬像素相片、支援Wi-Fi、Time Lapse、低光拍攝模式、40米防水等，難怪咁多X-Game發燒友都Buy佢。

將GoPro貼於滑板前端，便可拍低踩板路徑，畫面更富速度感。	HERO4 Silver的觸控屏幕清晰又靈敏，隔住個殼一樣篤到。	機身表面設有液晶體屏幕顯示設定，旁為指示燈。
採用細小的microSD卡，更設有HDMI和USB插口，以接駁收音咪等。	HERO4系列支援Wi-Fi功能，利用《GoPro》手機App配對，便可遙控拍攝和實時預覽。	測試區利用每秒30張高速連拍，人物主體夠清晰，連跳躍動作都捕捉得到。