洗邋遢DIY閃亮度新歲

低成本　當運動

傳統上年廿八洗邋遢，目的是希望將上年度的霉氣一洗而空，踏入新的年頭有新的氣象，除咗家居要大掃除，車一樣要洗乾淨迎新歲。一般來說，如果部車唔係有頑固污漬或黐有瀝青，洗車都可不求人，所需用品亦唔使好多，不講究的話，基本上十件八件用品已搞得掂，有齊海綿、塵掃、水桶、洗車液、玻璃水、洗軨水、皮革清潔護理劑及吸水布已經足夠，大概六、七百元左右便可買齊，用二、三十次都不成問題，每次成本都係廿零蚊，年中可慳番唔少。

先內櫳　後輪圈

洗車並不是甚麼複雜事情，但先後次序是不能亂來的，譬如行車過後不要即時向輪圈淋水，否則煞車碟可能因冷縮熱脹導致變形，影響到制動效能，因此宜先清潔內櫳，待制動系統冷卻。清潔車身時，應先用塵掃將漆面上的灰塵掃走，其後才弄濕車身用洗車液及海綿清洗，千萬不要甫開始便用濕布拭抹，此舉很易刮花車身，原本想整靚架車，點知搞到成車花痕，到時真係喊都無謂。假如有在車上吸煙或帶狗出街的習慣，內櫳少不免會有一點異味，最簡單的解決方法是放一個消臭罐在車內，大部分異味都得到消除，而且會散發芬芳香氣，六十幾元一個消臭罐，可用上2至4個月，非常划算。

化學品　勿亂棄

洗車地點並唔係每處都合適，最緊要係唔好阻到人，多車、人流高的道路都不宜，洗車時盡量不要影響其他道路使用者。不過，太靜的地方同樣不是理想選擇，遇到賊匪打劫，隨時財、車兼失呀！順便提一提各位，喺街洗車要顧及公德，洗完車切勿隨街傾倒污水，影響環境衞生，如果在公眾地方棄置偈油等化學物品，更有機會觸犯法例，這一點要謹記。

撰文：鄭浩文

攝影：張錦昌

模特兒：Anladia（GME）

查詢電話：2392 4244（台日汽車精品）