軟硬兼施Smartphone長氣攻略
今期Smartphone界熱話，除咗有熱炒嘅iPhone 5外，仲有勁多人出機嘅GALAXY Note II LTE。先唔講邊部機好用，其實兩大陣營都飽受「冇電」之苦，尤其是依家玩埋4G網絡，耗電量好似「倒水」咁快！唔通真係要就住用、成日唔上網？今次小記從軟硬件兩方面着手，教大家慳電攻略，仲搵專家醒各位外置充電器選購貼士，以後便可盡情暢玩手機。
軟件篇：熄4G減耗電
不少用戶投訴4G好「食電」，其實由於4G網絡技術不支援語音通話，所以每逢接聽或撥出來電時都要用回3G網絡；再加上4G覆蓋範圍有限，尋找網絡或者轉換接收訊號的過程，自然令耗電量增加。其實只需待機時關閉4G網絡並以3G取代，需要極速上網時才手動開啟，一來唔怕影響WhatsApp、Email等通訊，二來又可慳電啲，何樂而不為？
關閉同步功能
無論iPhone或Android用家，一般都會登入iCloud或Gmail帳戶，雖然可即時將手機資料進行同步，但原來佢哋係「食電」元兇。以郵件、聯絡資訊、行事曆、照片等串流同步，長期傳送數據無形中增加耗電量；倒不如將iCloud功能關閉，待連接Wi-Fi時方重新啟動，更具效益。而Android預設將Gmail中的電郵、聯絡人等與帳戶同步，用家亦可以選擇性地關閉部分同步功能。
硬件篇：留意電流輸出
想提升手機電池嘅續航力，最直接係買番個外置充電器，惟市場上嘅選擇超多，有平有貴，用家應該點揀？今次搵來MiPow充電器代理商迅靈科技，其產品經理Raymond表示：「選擇外置充電器，最重要係睇電池容量及電流輸出。前者以mAh為單位，數值愈大代表容量愈多，不過體積相對較大；後者以mA或者A為單位，以iPhone 5為例，原裝火牛的電流輸出為1A，若果外置充電器的輸出低於此數值，如只得0.5A，充電時間便會大大加長。」
安全性最重要
Raymond認為產品的安全性最為重要：「市面上很多不知名品牌的外置充電器，為求降低成本而採用低質素電池，或者直接誇大電池容量；最令人擔心是它們的電路板，短路裝置及絕緣設計不足，隨時會發生危險！而一般用家較難從包裝、外表上發現產品問題，建議選購獲得Apple等認證的款式，或者大廠出品，安全性較有保證。」
其他慳電方法
關閉通知及Siri（iPhone）：不少程式提供推播通知提示，全部長開當然食電；而Siri則需長時間連接伺服器，但實用度只屬一般，建議需要使用時才開啟。
限制程式流動數據（Android）：部分程式會於背景不斷使用流動數據，大大增加耗電量，用家可以限制個別程式的連接數據能力。
撰文：林子聰
攝影：盧展程、陳富權
查詢電話：（a）2388 4168、（b）2959 6226