蜚聲國際化妝造型師 Alvin Goh美麗背後

曾與影后舒淇、周迅、荷里活女星愛瑪沃森（Emma Watson）、超模Sasha Pivovarova等巨星合作的Alvin Goh，是炙手可熱的國際著名化妝師兼形象美容造型師。還記得去年Emma Watson訪港，她明亮的雙眸，襯上玫瑰色面頰，配上一抹鮮艷的紅唇，叫人留下極深印象，就連倫敦、美國等外國報章都一致給予好評，而此妝容正正就是出自Alvin的手筆。揚威海外，Alvin坦言令他感意外：「其實嗰日好趕，我同Emma講咗個妝嘅concept之後，佢好信任我，畀我自己發揮，期間佢仲不停同我講笑，合作得好愉快。」

獲Gucci創作總監賞識

其實Alvin的作品獲認同，又何止Emma這一次？他的威水史實在多得不能盡錄！他曾被國際著名品牌的Gucci創作總監Frida Giannini賞識，從眾多候選化妝師中脫穎而出，獲欽點為她於中國巡迴匯演期間的御用化妝師。「嗰次佢喺成個內地同香港搵化妝師，要我哋錄video化妝casting，等佢親自挑選，我就係畀佢揀出嚟嘅惟一一個。出trip幫佢做嘢嗰陣，真係好誇張，每次Frida去親邊度，都會有八、九架limosine一齊，前後仲有警車開路。其他人都唔可以輕易接近佢，但我就係佢每朝第一個見嘅人，真係令我覺得好自豪。」

鏡子裙是Alvin的得意之作，製作過程難關重重。	Alvin為愛瑪沃森化的妝大受好評。	Valentino的著名設計總監Maria Grazia Chiuri來港時，亦由Alvin操刀為她化妝。
Alvin把甜姐兒林嘉欣變身「壞女孩」。

要數Alvin的伯樂，Maggie Q必定榜上有名，更可說是一手提攜他的恩人。於2006年來港發展的他，來港初期曾經歷九個月「量地」的艱苦歲月，幸得Maggie賞識才走出困境。「嗰陣時Maggie已經去咗荷里活發展，其實佢喺嗰邊做嘢，好多時都有嗰邊嘅團隊，但係佢成日都堅持要個客畀我飛過去！」他更因而與香港著名攝影師夏永康結緣。「佢見到我幫Maggie化嘅妝，捉住我隻手同我講『我好耐冇見過咁靚嘅妝』，呢句說話我永遠都記得。」

Alvin擔任陳潔儀演唱會的創意總監，更為她度身訂造一條新潮紅裙。	Maggie Q主動要求客戶請Alvin來為自己化妝。	Lucia Pieroni的一番鼓勵說話，令Alvin感動得熱淚盈眶。

時刻走在潮流尖端、活在五光十色的娛樂圈，所接觸的都是靚人靚物，但對Alvin來說，「美」不僅是美麗的皮囊，而是每次創作所包含的內涵及底蘊。他很喜歡旅遊，吸取各地的歷史、文化及風土人情，從而啟發創作靈感。

Alvin說：「化妝同形象設計係一門藝術。我每次創作前，都一定會諗咗個theme先，希望大家感受到每件作品背後嘅故事。」他更一直抱着「You never know until you try」的信念，趕絕一切平板欠新意的設計，把所有異想天開的想法實現。為了做出滿意的作品，即使要重複千遍，他亦毫不在意，堪稱「完美主義者」！而其中一件令他感滿意的「突破」作品，就是把大家心目中的甜姐兒林嘉欣，搖身一變成為一個滿身紋身的壞女孩。「我喺佢全身畫晒紋身，完全係Good girl gone bad，出嚟嘅效果好震撼！佢自己都好鍾意，仲叫攝影師私下曬咗張相畀佢。」

不斷推自己去極限

作品受到賞識固然感到高興，但鐵人也有疲累的一刻，萬萬想不到Alvin亦曾經萌生放棄的念頭。「我成日要飛嚟飛去，真係好攰，有陣時真係會崩潰。不過我覺得唔應該discount自己，一定要不斷推去極限，只要一諗起有好多人相信我、支持我，就會有番動力重新開始。」要數最令他深受感動的一番話，必定是國際級彩妝美容形象師Lucia Pieroni的一句：「You are more than a make up artist!」事緣他們於工作上碰面，Pieroni一見面便對他說：「我上網搵過你嘅資料，你加油呀，朝住依家嘅方向繼續努力！」被自己景仰的化妝師鼓勵，即時令Alvin感動得眼淚在眼眶打轉，覺得自己一直以來的努力及堅持都是值得的。這句話大概成為他不斷創新、不斷鞭策自己的原動力。

不做時裝奴隸

生於新加坡的Alvin，早在十二歲便對化妝感興趣，當年更不顧家人的反對，堅持入行，成就今天的事業。「我覺得化妝好powerful，可以令到人更有自信，化妝之後好似變咗另一個人咁，好神奇！不過屋企人起初唔支持我入行，佢哋覺得男仔應該做正經啲、陽剛啲嘅工。不過我唔鍾意跟住人哋嘅意見做嘢，我知自己想要乜。」於時裝及美容界打滾，當然要時刻緊貼潮流，但他強調自己「拎得起放得低」，絕不會成為時裝的奴隸。「好多做呢行嘅人覺得fashion就係一切。因為工作關係，我一定會睇最新嘅潮流，不過我唔會特登買。其實我私底下着得好casual，最緊要係舒服，係要見人嘅時候先至着得靚啲！」

藝術展中的鏡子裙

為了挑戰自己，Alvin接受了cl de Peau Beaut的邀請，擔任展覽「L'Art de la radiance」的創作總監，並請來各地著名的藝術家合作，包括曾為Lady GaGa設計帽子的Piers Atkinson、曾為濱崎步、東方神起等巨星拍攝唱片封面的ND Chow等等。Alvin更於三個月間走訪各地，與他們一同炮製出最滿意的結晶品，但過程中卻遇到不少難題。「我哋想用鏡造一條裙，問咗好多師傅，都話冇可能做到，終於皇天不負有心人，有一個肯幫我哋造。不過造到出嚟，又遇到另一個問題，就係太重同有好多角位，着上身會好痛，所以我哋要加bubble wrap同毛巾喺裏面。」從籌備、策劃、邀請藝術家、設計概念至製作作品，Alvin統統都參與其中，難怪他稱此項目為他人生中的一大「里程碑」。

採訪：龔凱欣

攝影：謝國華