我們常埋怨，香港欠缺一個任你放聲尖叫的戶外音樂騷，要飛至台灣或英國，方可睇場好騷。或許是你眼光只懂看遠不看近，其實香港自2008年起，已有值得我們驕傲的戶外音樂騷Clockenflap。邀得多國勁旅撐場的音樂騷，只屬Clockenflap的其中一環，還有電影、裝置藝術、跳蚤市集及動畫等，而最、最、最令人尖叫之處，是免費入場！
從2008年開始舉辦的Clockenflap，始作俑者並非本地人，而是兩位「老外」——Mike Hill及Jay Forster，二人是香港藝術活動的活躍分子。歷屆的Clockenflap在數碼港舉行；去年因為場地規條問題，「委身」於Warehouse。2011 Clockenflap終於有運行，在西九舉行，主辨單位預期超過12,000人參與這次免費盛典。你沒看錯，真的是Free Entry，熱愛音樂的你，曾經揮盡千金飛英走美，為看場戶外好騷；現在只需擔定櫈仔霸頭位，等外國多支勁旅老遠飛過來娛樂你，突然覺得做香港人好幸福！據聞入場費全免，是在西九舉行的條件之一，可幸有贊助商支持，參與Clockenflap的市民又肯在場內小食亭多多消費，有望收支平衡，長搞長有。
Clockenflap經歷4屆成長，今年演出陣容歷屆最強，舉行地西九海濱長廊，將設立多個舞台（包括兩個戶外舞台、兩個電音舞台及兩個原音舞台），迎接世界勁旅的精彩演出。數十位來自美國、英國、芬蘭、中國及本地的優秀單位，將連續兩天演出，在維港瑰麗海景映照下，必有一番感官享受。芸芸演出單位之中，來自英國的樂隊Bombay Bicycle Club被視為焦點所在，將於星期六（12月10日）演出，相信屆時會吸引不少樂迷朝聖。來自紐約獨立音樂界的The Pains of Being Pure at Heart，以及著名電子音樂監製Luke Vibert也在當晚演出，必為樂迷帶來一個難忘的周末夜。當然，本地薑如9 Maps、The Evening Primrose、DP等，也會參與Clockenflap，是樂迷接觸本地Band Sound的好機會。
別忘了Clockenflap並非只是聯合國Band Show，同時也是音樂及藝術節，屆時西九海濱長廊將擺放多座耀眼的藝術裝置，當中包括Carlow建築公司為Clockenflap設計的「Clockenstools」，以及香港創作單位Salon de Pigeon、ST/ART及Aeroporto的藝術裝置作品。屆時還設有國際電影帳棚，播放短片、音樂錄像及動畫作品，以及香港獨立電影人的作品。難得香港製造的戶外音樂藝術節，比外國的更多元化，同場加映跳蚤市場、酒吧區及兒童玩樂區，一家大細齊齊參與，都可各有各精彩。
卡樂B：剛剛看了新片《我的華麗皮囊》，十個讚，艾慕杜華的確係鬼才，真係做到你估佢唔到。
小霖：我都睇咗優先場，睇完幾乎發惡夢，但絕對唔係唔好睇，啱啱相反，一路睇一路想知道真相，睇到一半，開始隱約覺得唔對路，開始諗：唔係下話，點知真係咁……
卡樂B：我又唔覺得惡心喎，或者男女睇法真係有分別啦。
星星：咁即係講乜啫？
卡樂B：唔講得，一穿橋就唔好睇！
星星：咁誇？其實我見到有安東尼奧班達拉斯，都有啲興趣想睇。
小霖：我反而覺得女主角最掂，係《對她有話兒》嘅Elena Anaya，靚到吖！係要咁靚至做到嗰種「驚」喜！
Edison：以後再無理由周末出沒中環lu……
Eason：你怕有狗仔跟？
Edison：因為潮人力捧嘅Yumla營業至明年1月1日咋！
Eason：Yumla多靚女咩？
Edison：咪以為我淨係識集郵！Yumla並非一般夜店，是一家純音樂酒吧，自2003年開業以來，孕育咗唔少優秀本地DJ，包括將在Clockenflap獻技的人氣女DJ Ocean Lam。
Eason：咁唔播Hit歌，播乜歌呢？
Edison：由Tech-house至Minimal Techno、Dubstep同Jungle、Electro、Punk同Hip-Hop……你呢類只懂唱Canto Pop嘅K歌之王，未必明！
Eason：我個個Friend都未聽過Yumla……
Edison：你啲Friend淨係識集郵囉，其實Yumla耐不耐有名人撐場，例如最早期嘅吳彥祖、黃子華、Yumiko，仲有唔少Model添。
Eason：做得好地地又點解結業？
Edison：仲使問，又係地產霸權囉！
onemanband：嗰隊Bombay Bicycle Club係咪全部來自印度呢？
撻成一塊：你睇《作死不離三兄弟》上晒腦咩？呢隊Indie組合係來自倫敦！
onemanband：同孟買又有乜關係？
太南極：井底蛙，倫敦好多印度人聚居o架嘛，組合名字來自一家印度餐廳——Bombay Bicycle Club，哈哈！
Onemanband：我鍾意食咖喱，多啲咖喱少啲雞呀，唔該！
撻成一塊：據聞呢隊Band來頭不小，出道短短5年，已經去過唔少大騷，包括Reading and Leeds Festivals及The Edge Festival等。
太南極：仲畀Sunday Times稱為「英國最佳樂隊之一」，前途一片光明。
Onemanband：要飛去倫敦先睇到？
撻成一塊：西九下個周末舉行嘅Clockenflap咪可以免費睇囉！
Onemanband：等我上YouTube狂煲首本名曲《Dust on the ground》Warm up吓先！
日期：12月10~11日
地點：西九龍海濱長廊
入場費：全免，於www.clockenflap.com登記，即可免費取得入場證。（12歲以下兒童毋須登記，但需有成年人陪同）
網址：www.clockenflap.com
撰文：彭欣欣