首玩雙核心！Sensation極速立睇

雙核心Smartphone並非今天才有，只是以往LG、Motorola一味講快，究竟有幾快卻難以形容。HTC推出時間落後了，但卻聰明地把雙核的威力，透過視覺效果Show畀大家睇。說的是採用了最新Sense 3.0立體介面的Sensation，無論過場速度、動畫效果都超華麗，雙核的優勢隨時睇到！

影相即拍即存

貴為HTC首部雙核心手機，Sensation採用了老拍檔Qualcomm的MSM8260處理器，兩顆核心各有1.2GHz，配合768MB RAM，執行程式的效率媲美電腦。有說其他廠用的Tegra 2處理器效能稍勝一籌，小記測試當日冇機在手，未能比較，但若跟早前單核心1GHz的Desire S一比，Sensation在《Quandrant Standard》Benchmark多出200分左右，分野明顯。若嫌數字太抽象，以往Android機影相經常會有Delay問題，但新機卻做到一按即拍，明顯感覺到雙核心的威力。

若選擇待機畫面為「相片瀏覽」，相片便會逐張自動放大。售價︰$5,198

800萬像素鏡頭連閃燈，可拍到1,080p影片。

4.3吋qHD靚芒

有粒快CPU，都要有個靚芒才能物盡其用，這方面Sensation配搭4.3吋電容式觸屏，尺寸跟同廠靚芒王Desire HD一樣咁誇，但背後技術就由TFT變成S-LCD，加上解像度達540×960 qHD水平，顏色更Sharp更準之餘，睇16:9電影還飛走黑邊，觀感極佳。靚芒以外，外形一樣有睇頭，銀灰色機身採用了一體成形鋁合金設計，不但令線條更Slim，亦減低入塵機會，乾淨晒！

3.5mm Audio介面及開關掣設於機頂。

支援32GB microSD，但要拆走電池蓋才可更換。

機身及電池蓋均屬一體成形設計，大大減低入塵機會。

全新3D介面

HTC的Sense介面向來多人讚，但2.1版本都沿用了一段日子，Sensation有雙核心撐腰，終於可「升呢」上Sense 3.0。最大特色是加入3D介面，令開機畫面、頁面切換時出現立體過場效果，比見慣的2D介面醒目得多！此外，新介面也強化了鎖機功能，可於Lock機時從Friend Stream、天氣及股市等Widgets之中，任揀一個當作待機畫面，手機毋須解鎖就Update到最新資訊。