當全城「霜峯」尚未治愈，全港便提早慶祝端午跑去搶食「3D鹹肉」。一圍朋友用膳，頭盤仍未上枱，女生的嘴巴已搶着發難。
「你睇咗未？得唔得？」「我朋友睇咗，話前段色情、後段血腥……」「聽講好多女性觀眾入場喎！」「咪係，我朋友都係女性……」「早前電影搞Ladies' Night，好爆，仲爆過男女混合場……」「我都想同成班Girlfriend去睇呀！」然後，這群女生望着我說：「你實有睇啦！」其實，我不會去看，我真的沒興趣。其實，純粹話題性的電影，我都不感興趣。何況小道消息從幕後流出來……那女主角是「露點」或是「老點」，心中有數啦，瞞不過宅男的金睛波眼。在座某女生一番好意地說：「唔去戲院睇都冇所謂啦，遲啲睇DVD囉。」唉，我說不去戲院看，她們就認定我在家煲鹹肉粥。
記得三級制實行後，《感官世界》上映，在座近半數是準備「大開色界」的女子。早前的《色慾都市》、《色戒》，亦贏得自由行女性大力支持。還有「希希情慾相簿」，成為全港女性指定Download恩物。歸根究柢，女性想光明正大接觸情色物品，通常需要借用一些「幌子」，有藝術的包裝，或通俗娛樂做支援，或「全城話題」作後盾，方感到釋然，覺得自己有別於吃鹽花生長大的宅男和麻甩佬。
所以呢，女性不會明白男人看情色片的心態。你們好恨睇的，我們未必。我想看的話，何需等這個半鹹不淡的鹹肉？
旅遊飲食寫作人