雙截龍

今年係李小龍先生70歲冥壽大日子，坊間有唔少紀念活動，玩具廠亦出來湊湊熱鬧，繼Enterbay早前推出1:4全身像後，另一大廠Hot Toys亦玩埋一份，推出《龍爭虎鬥》1:6 Figure，一個價錢兩個Body，先唔講似唔似，單計「量」已先贏對手一仗。
圖中為試辦款式，與正式推出的版本或有少許分別。
圖中為試辦款式，與正式推出的版本或有少許分別。

正面挑戰E記

Enterbay及Hot Toys兩間本地Figure廠向來河水不犯井水，前者專造李小龍等本地明星，後者則主攻荷里活電影角色，不過自從《教父》後，兩者便開始正式交鋒。今次Hot Toys突然推出李小龍，白啲講就係「明剃對方眼眉」。據HT表示，今次揀《龍爭虎鬥》為藍本，主要因為此戲是龍哥的巔峰之作，不但情節內含截拳道精神，造型、配件亦係眾作品之冠，以此製作Figure，對龍迷的吸引力最大。

雲集8大高手

要挑戰對手，首要造得神似，E記有神級大師金亨彥坐鎮，功力毋庸置疑，HT為此找來8大高手合作，例如由Yulli雕頭、JC.Hong上色，若單論正常靚仔樣，五官、臉形及多層軟膠頭髮都有八﹑九成似，而在P.E.R.S.技術幫助下，雙眼還可360度轉動，眼神要幾凌厲都有。惟戰損版就有點令人失望，雖然臉上3條傷痕都幾逼真，但整體神韻不足，期望大貨時可以執一執。

跟足電影有齊少林齊眉棍、菲律賓短棍、雙節棍等武器，最過癮係送埋條蛇，可放入夜行衣嘅索袋入面。
  • 跟足電影有齊少林齊眉棍、菲律賓短棍、雙節棍等武器，最過癮係送埋條蛇，可放入夜行衣嘅索袋入面。
功夫鞋、白襪都可脫下，方便套用到其他Figure上。
  • 功夫鞋、白襪都可脫下，方便套用到其他Figure上。
附送白色唐裝衫一件，戲中龍哥打死仇人敖家達就係着住佢。
  • 附送白色唐裝衫一件，戲中龍哥打死仇人敖家達就係着住佢。

爆肌Body太誇張

《龍爭虎鬥》乃龍哥巔峰之作，肌肉狀態處於最Top Fit狀態，HT特別為此重製一款爆肌Body，技術跟先前狼人近似，外層係膠皮，內裏則係PVC骨架，而手形則有詠春、捽鼻等；配合30個關節，要擺「李三腳」或「寸拳」等Pose都唔成問題。要彈的反而係肌肉似乎勁過頭，似筋肉人多過真人，若能瘦一點、自然一點，效果會更好。特別一提，隨盒除跟多一套爆肌Body外，鏡房還可拆成兩個布景，若HT日後造埋石堅叔飾演嘅韓先生，就可重演結局一幕了！

可變裝成夜行Look，衣料具彈性，即使咁貼身都不會妨礙郁動。
  • 可變裝成夜行Look，衣料具彈性，即使咁貼身都不會妨礙郁動。
送正常及戰損版兩個頭雕，雙眼同樣可轉動，但邊個似啲，看倌就自行判斷了。
  • 送正常及戰損版兩個頭雕，雙眼同樣可轉動，但邊個似啲，看倌就自行判斷了。
  • 放大圖片
爆肌Body乃重新開發，無論皮膚紋理、傷痕或汗珠都幾可亂真，可惜肌肉太誇張，略欠自然。
  • 爆肌Body乃重新開發，無論皮膚紋理、傷痕或汗珠都幾可亂真，可惜肌肉太誇張，略欠自然。
JC.Hong話李小龍最難做係神態，因為唔同時期樣子都不同，要重複觀看影片先雕得似。
  • JC.Hong話李小龍最難做係神態，因為唔同時期樣子都不同，要重複觀看影片先雕得似。
共跟14隻可換手掌，數量為Deluxe Series之冠。
  • 共跟14隻可換手掌，數量為Deluxe Series之冠。

VIP預訂價︰$1,530（連兩個Body）

非VIP預訂價︰$1,580（連兩個Body）

推出日期︰今年第4季

撰文︰陳志滔

攝影︰張群生

查詢電話︰2388 4677