小豬迷齊齊隊枇杷膏

羅志祥（小豬）一向好識氹歌迷，同班女歌迷玩搞婚禮、擺酒席、度蜜月咁，仲口口聲聲叫班女歌迷做「老婆」，難怪咁多fans瘋狂追星。前排小豬喺香港搞演唱會，總算圓夢踏足紅館，中、港、台三地歌迷齊集捧場，除咗陪佢唱歌，每次小豬換衫、講笑話、騷肌肉都難免要尖叫幾聲，唔少歌迷都嗌足全程，所以佢哋除自備螢光棒、哨子外，仲帶埋枇杷膏潤喉，每次小豬入後台換衫或者嘉賓唱歌位，佢哋就好安心咁坐低拎住一樽樽枇杷膏狂隊，場面都幾搞笑。