眾所周知，黃日華同「三哥」苗僑偉情如手足，咩嘢都樂於分享，最近華哥仲介紹咗個妙齡女子畀三哥認識，千祈唔好誤會，其實係因為呢個女仔竟然同「三嫂」戚美珍好相似！佢就係無綫新藝員邱頌兒，最近喺《女皇辦公室》做個唔起眼嘅OL角色，華哥因為同佢喺新劇《刑警》合作而認識，估唔到竟然喺佢身上見到三嫂嘅影子！
華哥覺得頌兒笑嘅時候同三嫂最相似，於是趁住拍劇嘅空檔將頌兒介紹畀三哥識，三哥見到頌兒都好錯愕，不停點頭微笑，最初頌兒聽到華哥話自己個樣似三嫂都不知幾開心，頌兒話：「三嫂當藝員時咁靚，話我似三嫂即係間接讚我靚啦！」
