「戰國Basara」雖然一如「無雙」系列都係玩喪劈，不過勝在動作招式較華麗，任務變化亦較多。遊戲在PSP平台推出，讓玩家可在麥記組黨開戰，但咁玩法仍然未夠喉，所以新一章PSP版「戰國Basara Battle Heroes」加入二打二自由組隊「四打」新玩法，你用毛利元就，我用德川家康都一樣可以合作殺敵，爽！
撰文：布偉倫
巨型兵器天馬行空
正如玩「戰國無雙」，玩「戰國Basara Battle Heroes」之前最好溫一溫日本戰國歷史，不過就算唔識都唔緊要，單睇今集所收錄嘅30個武將造型突出，睇樣揀人都冇所謂。這30個武將都有全新製作嘅故事，而主線嘅任務模式就有以伊達政宗為中心嘅「蒼穹」、真田幸村為中心嘅「紅蓮」同前田櫻次為中心嘅「櫻花」三個戰記，每個戰記各有50個獨立任務，總計150個任務已經有排玩。
最正都係二對二嘅組隊自由對線模式，而故事內容就取決於拍檔之間所選擇嘅武將，決定好裝備之後就可上場喪劈，挑戰敵方武將或者巨型兵器都得。「戰國Basara Battle Heroes」仲有個好處就係冇太大嘅歷史包袱，好似關卡中所出現嘅巨型兵器都幾天馬行空，仲有識行識走嘅「木騎」同巨大人形「仁王車」，玩落真係有啲「芒亨」Feel！
遊戲資料
類型：動作
開發：Capcom
平台：PSP
推出日期：已推出
售價：$328
查詢電話：2725 3338