這陣子忙着為自己的新書度橋，無錯，你無睇錯，陳刀會出書，應該在今年書展，應該……真係應該，唔知……因為原來做作家出一本書都唔係你話出就出咁容易，我諗人人都以為作家寫完啲文，有出版社幫你出咁咪就可以出囉！我本來都以為係……不過，原來當中有好多嘢是要計過度過……唔講你真係唔知！
出書之前，第一件事，是你要去諗你本書有咩值得人買，你有咩咁特別，你用咩去吸引人，點解人家要買你本書唔買其他人啲書？嘩！呢件事已經夠你諗幾日。之後，第二件事，是你要去諗你自己究竟企喺個咩位？你要畀個咩形象你啲讀者，你要畀個好鮮明好突出的形象，唔通你真係認為人人都可以做作家出書，你唔諗就一定唔會贏。未完㗎，你都仲未諗到個好有意思的書名，內容有幾多？目錄分幾多章幾多節？齋文定有圖有相？救命！原來做作家唔係淨係寫完就算，有好多嘢唔係你諗咁簡單……或者應該咁講：呢個世界，睇就容易，做就知道當中有幾難！
希望你哋喺書展，會覺得我的第一本書值得你哋買吸引你哋買啦！
時裝設計師