絲絲講場：燕麥奶企爆紅 估值達780億

Oatly納市招股 印證素食潮流

瑞典燕麥奶製造商Oatly喺美國納斯達克進行首次公開招股（IPO），每股定價17美元，屬招股定價範圍上限。2001年才推出第一樣產品嘅Oatly發展迅速，燕麥奶已經喺20多個國家、6萬間零售商和3.2萬家咖啡店中嘅貨架出現。

Oatly喺招股說明書開宗明義咁話：對人類和地球更有利的食品系統抱有大膽嘅願景。雖則望落包裝設計好年輕跳脫，但佢嘅大股東其實係由中國政府持有嘅實體同一間比利時公司嘅合夥企業。另外，私募基金巨頭黑石集團（Blackstone）都有約8%股份。

點都好，Oatly做到上市，就證明素食品行業繼續吸引投資者，體現千禧一代和Z世代（泛指1995至2009年間出生）消費者對健康嘅關注，呢班年輕城市人更加關注動物產品對環境嘅影響，亦都願意去畀更多錢買健康食品。

其他素食概念公司，好似人造肉公司Beyond Meat一上市就爆紅，唔知Oatly嘅命運會點呢？

另外，講到食品，率先爆升嘅仲有蕎麥麵價格！日媒報道，今年首季中國向日本出口嘅蕎麥大減26%，令日本不得不緊急從俄羅斯進口，帶動俄羅斯蕎麥價格上升。唔講唔知，日本蕎麥絕大部分依賴中國進口，自家生產僅佔兩成。成本增加，日本蕎麥麵開始加價，一碗麵由310日圓（約22港元）加價去到320至340日圓（最多約24港元）。加兩蚊？冇所謂啦！反正絲絲都冇得去日本。

余絲韻