絲絲講場：朱仔「助攻」 安巴尼再做亞洲首富
呢排國際油價曾經破天荒跌到去負數，絲絲睇到眼都凸埋，世上真係無奇不有。不過油價咁跌法，唔單止炒燶期油嘅人慘輸身家，富豪們都唔好過。好似靠石油起家嘅印度首富安巴尼(Mukesh Ambani)，近日就因為油價急瀉而身家大縮水，亞洲首富之位也一度讓咗畀阿里巴巴（09988）前主席馬雲。而喺今個禮拜三之前，安巴尼身家年內縮水咗140億美元（1,092億港元）。
之但係，奇迹往往喺絕地中出現！Facebook創辦人兼行政總裁朱克伯格（朱仔）最近入股咗安巴尼旗下公司，變相救番後者一命，更令呢位能源大亨重奪番亞洲首富之位。
旗下Jio獲fb大手投資
啱啱喺周日（十九日）過咗63歲生日嘅安巴尼，持有信實工業42%嘅控制權，旗下有全球最大嘅煉油廠、印度最大嘅電訊營運商Jio。佢亦持有唔少房地產同一支職業板球隊。今次fb向信實工業旗下電子服務平台Jio Platforms投資57億美元，刺激信實股價急升，安巴尼嘅身家亦因而水漲船高。
睇番最新嘅彭博億萬富豪指數，依家安巴尼身家有492億美元（約3,837.6億港元），再度成為亞洲首富，全球就排第十七位。
而全球最有錢嘅繼續係亞馬遜創辦人貝索斯，身家有1,430億美元（約1.11萬億港元），微軟創辦人蓋茨就排第二，身家有1,030億美元（約8,034億港元），「朱仔」排第五，身家有697億美元（約5,436億港元）。全球十大富豪中，有七個係靠科技發達，真係科技改變世界。莫非絲絲都要變身IT女？又或者搵番個IT富豪歎世界？
余絲韻