港股跌唔落，升又唔多夠力。尋日收市只係升咗83點報23,977點，暫時企穩20天線樓上，距離10天線24,150點亦唔遠，來來回回Chok上Chok落，似乎想考驗缸邊友耐性，未來爆單邊的機會增。
睇番疫情，香港已連續多日保持單位數確診，近日受災最勁的美國亦有多個州話要重啟經濟活動，隨疫情日益好轉，支持港股向上的機會大過向下，問題係向上的力度有幾大？老古自然估唔到仲可以升幾多、升幾耐，但港股由三月十九日低位一度回升逾3,000點，短線嚟講再向上空間有限，入市策略最好都係保守啲，亂世中都係保本為上。
而傳統智慧話亂世要買金，依家買金礦股又係咪啱時機？以在港上市嘅金礦股嚟講，山東黃金（01787）較優質，去年純利12.9億元人民幣，按年升33.8%，比同行招金礦業（01818）及紫金礦業（02899）優勝，側面反映管理層較佳。且黃金儲存量和開採成本都較具競爭力。因此，該股走勢較為貼近金價，爆發力亦強。
再睇走勢，山東黃金股價沿着10天線向上直升，所有移動平均線趨升，強勢畢現，尋日更創歷史高位23.2元，以三月十九日低位14.6元計，一個多月已經升近6成，後市會唔會高處不勝寒？睇好金價的缸邊友，不如等回調至20天線20元水平，再部署分注吸納。
古勝