稱得上係「金句王」嘅格力電器董事長董明珠，近日又就住新冠肺炎發表偉論！佢慨嘆，近呢幾十年嚟，內地民眾一直生活喺蜜糖罐入面，八、九十後更冇經歷過磨練，而呢次疫情可以畀大家睇到「付出」嘅價值。
佢又話，呢場疫情唔可以簡單用經濟產值下滑嚟衡量，而係要睇疫情為大家帶來啲乜。佢坦言，公司二月生意大跌，但仍然會投放10億元人仔進軍醫療業，將呢場危機轉換成挑戰，仲話預咗無回報。
不過，近期公司嘅殺病毒空氣淨化器需求大增，生產嘅口罩亦賣斷市，算係對整體生意有啲幫補。董明珠講明，生產呢啲物資本身利潤唔高，預咗將10億人仔倒入鹹水海，但點都要諗方法突破困境！
余絲韻