絲絲講場：做齊4件事 職場百戰百勝
為咗升職加薪，你可以去到幾盡？絲絲早排睇咗一間北美保險公司嘅報告，話有四件事，若果依家唔重視，十年之內一定會後悔！調查又發現，美國有三成人好後悔冇做呢啲事，仲影響到依家嘅生活。所以話，「博盡」未必係「無悔」。
1. 努力維繫友情
返工忙咗一日，心血來潮想搵個朋友一齊吃飯，但居然冇對象？若然各位依家唔努力聯繫朋友，當事業遇上困境，甚至陷入人生低谷，就無人扶你一把！
2. 培養運動習慣
等絲絲估吓大家一個禮拜嘅生活係點？首先星期一至五就喺Office坐足一日，返屋企又攰到攤喺梳化直到瞓着；到咗星期六日，又要瞓一日補眠。如果絲絲估啱咗，各位真係要睇睇《神經學》期刊嘅研究，報告話經常運動可延遲大腦衰老十年，即係40歲嘅人可以擁有30歲嘅思考速度同品質，計落抽時間做少少運動仲抵過嘥錢去回春！
3. 做好壓力管理
香港人出晒名急，做嘢又Chur，之但係過大工作壓力可能令你身心疲倦，甚至患病。最好就搵個時間，檢視自己造成壓力嘅來源，然後逐個擊破，咁做人輕鬆好多。
4. 勤追蹤健康史
唔少人會喺30歲嗰陣，送自己一套健康檢查做生日禮物，呢個係明智之舉，因為健康先有本錢喺職場打拚。定期追蹤健康史，如檢查血壓、膽固醇等相當重要。
黃國英倡做運動紓壓
唔知金融財俊又認唔認同以上人生必做四件事呢？豐盛金融資產管理董事黃國英就話，自己喺金融界咁多年，都習慣咗面對壓力。
佢話每晚臨瞓前會練做半個至一個鐘氣功，一個星期仲會做兩次Gym，紓緩壓力。
應酬太多辛苦自己
不過，黃國英就唔太認同每人都需要有好多朋友。佢話自己唔太喜歡圈子太大，因時間已經少，唔想太多應酬，夾硬要見好多人，變相係辛苦自己。
余絲韻