絲絲講場：輟學搞生意 星創業家話咪博！

林恩宇：入行已磨練幾年

講緊嘅係現年32歲、新加坡籍嘅林恩宇，佢21歲時自大學輟學，全心全意與合作夥伴共同創辦國際女性服飾品牌Love, Bonito，至今已發展成數百萬美元嘅事業。

之不過，佢接受外國傳媒訪問嗰陣，回想應唔應該輟學去全職創業，就唔建議想創業嘅人走佢嘅路！佢仲直接話：「大家可能無留意到，我喺放手一博之前，其實已入行一段日子。」換言之，其實佢唔係博！

呢位女創業家在學時已經同朋友合夥開設服飾網店，即係話佢孤注一擲前，已磨練幾年，包括售賣滯銷產品，引進海外服裝，甚至生產自己嘅設計。林恩宇回想「嗰三、四年一邊兼顧學業，一邊打理生意，學到好多關於呢一行嘅事。」結果佢將Love, Bonito定位為「現代亞洲女性」目標客群，強調科技優先嘅服飾品牌。

○九年，林恩宇距離取得大學畢業證書只差八個月時間，當時做出輟學決定，仲同媽媽借咗「棺材本」嚟償還學生貸款。呢個決定，就促成咗一位成功女創業家。

其實外國唔少名人都輟學創業，如蓋茨喺哈佛輟學，同保羅艾倫創辦微軟；Facebook創辦人朱仔亦冇完成哈佛大學學位，就全力打造佢嘅校園社交平台，但佢都曾經話呢個係一個遺憾，好彩輟學十二年後，又獲得哈佛頒發榮譽學位。

余絲韻