絲絲講場：「閃電炒家」疫市冇飯開？
新冠肺炎來襲，好多打工仔由農曆新年起就Work from Home（WFH），而之前雲集金融才俊嘅中上環區變得十分冷清。金融界人緣超好嘅國農證券董事總經理林家亨（Simon Sir），往日最鍾意約埋行家們一齊去茶樓飲茶，依家得番幾丁友，不禁呻疫情搶走咗佢班飯腳，搞到佢冇飯開！
林家亨老友WFH 無晒飯腳
Simon Sir過去每個月最少會搞一次金融圈飯局，仲會邀請絲絲出席。但由於近來好多金融朋友都唔使返公司，約唔到飯局，搞到成個幾月冇見金融圈老友。咁啱，絲絲喺疫市亦要正常返工，所以就私下約佢聚一聚。大家都有啲感觸，以前最少都坐滿一席，但如今僅寥寥數人。
昔日，佢嘅忠實飯腳包括智易東方證券行政總裁藺常念、帝峰證券及資產管理行政總裁郭思治，同埋銳升證券聯合創辦人及首席執行官鄧聲興，有時候仲有埋其他老友加入。而呢班惺惺相惜嘅金融巨星們，就算幾忙都會趁中午休市見個面，歎番啖靚茶，講吓股經。
但近月再冇聚會，佢就喊晒口咁嗌悶！查實大家又點會唔掛住Simon Sir，佢喺行內有「閃電炒家」之稱，每次見面都有得聽佢分享最貼市消息，知道吓佢喺沙塵滾滾嘅戰場上如何殺出一條血路，大家都聽到好過癮！
余絲韻