港股昨日一度跌至26,000點邊，惟好快即見反彈，曾彈上26,424點，收報26,391點，跌53點，成交712億元，都冇咩微言大義，反正都係悶局一場，市場缺乏焦點。
今年內銀股表現跑輸大市，工行（01398）及建行（00939）現價較去年底低1%及4%、農行（01288）及中行（03988）分別跌6.9%及7.9%；交行（03328）跌幅更高達16%，收6.6厘息唔夠蝕價。
事實上，五大內銀股跌幅算係濕濕碎，其他地區性中小型銀行跌幅驚人，好似錦州銀行（00416）、中原銀行（01216）、甘肅銀行（02139）、天津銀行（01578）、江西銀行（01916）、九台農商銀行（06122）及鄭州銀行（06196）今年以來股價累計跌幅介乎30至68%不等，成交又少，真係生人勿近。
筆者相信，今年大戶持續減持內地金融股的趨勢會在明年持續，呢個板塊不論大小，都係維持眼看手勿動！
不過，論跌得甘，今年三隻中資電訊股表現都係差到冇朋友，中國移動（00941）、中國電信（00728）及中國聯通（00762）今年以來累跌幅度介乎19至25%。但三者近日跌勢雖急，但技術指標14日RSI開始出現明顯背馳。若市況配合，不排除短線有一成以下反彈並不足奇，但走勢今年的破底格局實在太差，長期而言弱勢未改。
昨日本欄提及的汽車股似乎真係有啲異動，見到廣汽集團（02238）、華晨中國（01114）、北京汽車（01958）同逆市升逾3%，東風集團（00489）升1.4%，吉利汽車（00175）升0.6%。論人氣，以廣汽較佳，可以望多兩眼。
古勝