絲絲講場：滙豐奇招湊貴客 入熱帶雨林追猩
今時銀行湊貴客唔簡單，要帶隊入熱帶雨林追猩兼種樹！無他嘅，皆因關注環境可持續發展嘅投資已成市場新趨勢，加上有得探險歷奇兼可「自我增值」，仲好玩過迪迪尼，試問有邊啲有錢客會唔鍾意呢！
講財富仲講環保
講緊嘅係滙豐銀行嘅「可持續發展考察之旅」，本來只係畀銀行高層同私人銀行客戶參加，認識要增加財富同時要顧及環保同氣候變化等，該行最近就帶埋理財總值100萬美元以上嘅尚玉客戶，去馬來西亞婆羅洲熱帶雨林考察。
婆羅洲考察有咩特色？原來會深入當地丹濃谷五日睇紅毛猩猩、婆羅洲侏儒象、鼯鼠同長臂猿等，睇完動物仲有得落手參與，齊齊種咗80棵婆羅洲盛產嘅龍腦香樹，有客戶參與完即刻話以後採購同裝修都會考慮環保因素，仲反思埋點樣拯救地球！
揼本請科學家領軍
一般人入熱帶雨林要有專家傍住，滙豐零售銀行及財富管理尚玉服務全球總監陳婉貞透露，旅程有一流科學家帶隊，認真揼本！
余絲韻