絲絲講場：獵頭公司CEO醒你面試4貼士
經常有初出茅廬嘅年輕人問見工最重要係乜？計絲絲話一定係自我介紹，話晒畀人第一個印象係好重要！嗱，唔係絲絲吹水，連全球最大行政人員獵頭公司光輝國際（Korn Ferry）嘅CEO Gary Burnison都係咁講。佢話，求職者見工嗰陣往往只係照背履歷表（CV）寫嘅野，難以留低深刻印象畀面試官，咁又點能夠突圍而出呢？
咁點嘅自我介紹先叫好？就等Gary傳授4招求職秘笈，教大家輕鬆通過面試第一關！
1. 無謂重複履歷表細節
好多求職者喺自我介紹環節，就已經等唔切要分享工作上嘅成就。但其實面試官一早已經睇過晒份CV，預咗之後會問番你過往工作經歷，所以CV裏面提過嘅，就無謂再嘥時間重複啦。
2. 分享趣事 留深刻印象
一開波絲絲都講咗，幫自己留低深刻印象係好重要！因此，自我介紹環節不妨同面試官分享自己嘅趣事，如果Show到獨特嘅一面，又或者將個話題扣緊番面試嘅工作相關要求就最好啦！
3. 展現生活熱誠及目標
咁如果自認講嘢唔夠有趣，仲有另一種辦法，就係分享你做過最有成就感嘅事。成就呢樣嘢係無分大小，最重要係顯示到你對生活有熱誠同目標！即使你只係講第一次嘗試跑十公里馬拉松，都完全可以反映勇於面對挑戰嘅個性。
4. 切勿背稿 最緊要坦白
最後Gary指出，求職者千萬唔好用背稿形式做自我介紹，最緊要係唔好講大話，或者誇大自己嘅經歷，因為萬一問問吓答唔出畀試官「踢爆」，你所有嘅嘢都會受到質疑！
下次大家自我介紹嗰陣，要謹記Gary教嘅4招！不過，其實面試最重要都係唔好緊張，做番自己，保持最佳狀態示人，咁就事半功倍！
余絲韻