絲絲講場:打機試做CEO 你玩到幾耐?

眼見電動車企Tesla(特斯拉)CEO馬斯克因亂發Tweet惹誹謗官司,WeWork位諾伊曼就不知所謂到被公司踢走!你覺得自己做CEO實掂過佢哋?試吓玩個Game睇過唔過到關再講啦!

分配資源 學習取捨

英國新Game《The Trade-off》,畀玩家扮演一間科企嘅CEO,「工作任期」四年。雖然都係幾條選擇題,不過你玩幾次就知,做得唔好,真係會中途被人炒魷!

一開波,玩家就要為公司上市後嘅未來分配資源,喺業務增長、長遠發展、社會責任同埋環保責任之間做取捨,目的係說服投資者畀錢公司,同時氹掂班股東,仲要唔好畀人炒!

途中你會面對突發嘅挑戰,每個挑戰都取自真實題材兼極具爭議性,令你陷入兩難局面!例如早前初創科企Chef與美國移民及海關執法局(ICE)簽訂合約,但員工同外界因為總統特朗普嘅反移民立場而對份合約產生不滿,咁你會放棄盈利定係公司聲譽?

另一實況,中美貿易戰打到嚟,經濟衰退令公司要開源節流,作為公司CEO又應唔應該保留象徵企業文化嘅咖啡室?

捉摸投資者股東心理

絲絲就覺得,投資者同埋股東嘅心好難捉摸,就連畀唔畀員工參與有關氣候議題嘅罷工,都會影響到投資者對公司嘅睇法,所以話一間公司嘅CEO認真唔易做!但如果你自問係一個商業奇才嘅話,不妨玩呢個Game,接受一下考驗!

余絲韻