Market Insight：聚焦周內重磅股業績

如果要揀較值博板塊，可以考慮物管股及醫藥股。先睇物管股，呢個板塊炒了唔少時間，但物管股勝在有內需概念之餘，又唔太受人民幣貶值影響，加上可吸引部分由內房股撤走的資金轉投其身上，炒作條件確唔錯。

選股上，原本跟勢炒都係最正路，而近日永升生活服務（01995）及新城悅服務（01755）皆創新高；相對地，較具規模的碧桂園服務（06098）及中海物業（02669）雖然升得唔錯，但前兩者動力明顯較強，尤其是投資者若以短炒為目的，更應以前兩者出擊；若是中線投資，則宜逢低吸納後兩者。

揀醫藥股 有大食大

至於醫藥股亦跑贏大市，上周板塊動力來自內地醫藥股龍頭恒瑞醫藥（600276.SH）公布首三季多賺近三成，不過唔係隻隻醫藥股都升得咁靚，主要資金都係押注落兩隻藍籌醫藥股石藥集團（01093）及中生製藥（01177）上。咁又難怪，就算中美貿易協議有好消息，但未知幾時大結局，隨時係表面風光，投資者押注都係有幾大隻買幾大隻，反而二三線股份暫時博唔過。

本周繼續有業績公布，值得注意是中國人壽（02628）及中國銀行（03988），應可觀察中國經濟放緩下，對中資金融股的盈利收入影響。外圍方面，美國本周公布第三季國內生產總值（GDP）及議息結果。

據CME聯儲觀察工具顯示，現時交易員預期本周美國減息0.25厘，到1.5至1.75厘的機會率達93.5%；到十二月維持1.5至1.75厘的機會率有70.4%，進一步減息0.25厘，到1.25至1.5厘機會率有24.9%，所以唔好單睇美國長短期債息孳息無倒掛（現時十年及兩年國債息差距約0.19厘），就認為美國經濟好，其實前景亦不明朗。

古勝