絲絲講場：亞馬遜冧價 貝索斯首富地位危

貝索斯一七年十月壓過蓋茨，坐上全球首富之位。如今蓋茨重新「坐正」，反映微軟股價年內累漲近38%，持1%股權嘅蓋茨身家進帳不少。彭博億萬富豪指數顯示，截至周四止，蓋茨身家1,075億美元。

至於貝索斯，若佢冇同太太離婚，理應可保住全球首富之位。二人於一月宣布離婚，前妻麥肯齊於七月份瓜分咗二人所持亞馬遜股權嘅四分之一。

上季少賺26% 遜預期

講番亞馬遜上季業績，純利按年倒退26%至21億美元，或每股4.23美元，遜於市場預期嘅4.59美元，主要因為該公司為咗提供一天後送貨服務而大舉投資，期內經營開支急升26%至668億美元，為逾一年來最大升幅，送貨成本亦勁增46%至96億美元。

亞馬遜上季整體收入升24%至700億美元，優於預期；來自雲端業務AWS收入增35%至約90億美元，但較前一季之37%增幅放慢。該公司預期今季經營溢利介乎12億至29億美元，收入料介乎800億至865億美元，分別低於預期之43.1億美元與872億美元。

美股周五早段，亞馬遜股價急挫4.82%至1,695美元。

余絲韻