Market Insight：短炒為主 慎防氣氛逆轉
上星期影響港股的「內憂」與「外患」皆有新發展，前者方面，雖然政治事件未解決，但起碼施政報告於房地產政策方面有突破；後者方面，除中美首階段貿易談判取得進展外，英國亦在最後關頭與歐盟達成新脫歐協議，環球投資市場氣氛改善。
不幸的是，中國第三季國內生產總值（GDP）增速放緩至6%，再創有紀錄以來新低，雖然話第四季增長只要唔跌穿5.4%，今年全年GDP依然可以「保六」，惟這主要靠上半年的升幅撐住，所以明年能否達標，暫時睇牌面都唔係幾樂觀。
重磅股陸續放榜
港股方面，受惠貿易戰放緩及人民幣貶值速度或減慢之預期，資金暫時主要押注落較重人民幣資產的中資金融股、紙業股，以及一直走勢較硬淨的物業管理股及個別較具鑊氣的教育股身上，但其他板塊上升動力似乎唔太強。當然，上周受惠施政報告的本地地產股亦威過幾日，但動力仲可唔可以延續，咁就要拭目以待。
策略上，市場氣氛改善，惟部署上亦仍應以短線出擊為主，因氣氛對市場動力之影響通常較短暫，故上文提到較旺場且走勢唔錯的板塊唔係唔可以押注，但要謹記押注前宜先訂好目標價及止蝕位，並嚴格執行，以免氣氛一轉吹逆風時即「逃生無門」。
另外，今個星期好多重磅股公布業績，好似今日就有中國聯通（00762）業績，周三就有中國海外發展（00688）及農行（01288），周四則有萬科（02202）及平保（02318），周五亦有交行（03328）、工行（01398）及國藥（01099）等，故已持有或想買入相關股份的投資者，宜先以不變應萬變，待業績公布後再謀定後動。至於外圍數據方面，美國周四公布的九月耐用品訂單及Markit製造業PMI，大家亦必須望望，以分析其經濟底子究竟是龍是鳳。
古勝