港股昨受外圍影響，曾失守二萬六關，惟因即市傳來政府擬透過緊急法推反蒙面法而止跌回升，實際上市況仍淡靜。短期指數相關衍生產品可以少睇，呢啲淡靜市，舞高弄低三兩百點毋須太多理由，無謂落場做炮灰。
藍籌股中，還是內需股及貿易戰相關股份表現較硬淨，如石藥集團（01093）、舜宇光學（02382）、萬洲國際（00288）及蒙牛乳業（02319）逆市靠穩。本地地產股繼續成沽售對象，長實集團（01113）、信和置業（00083）、九龍倉置業（01997）均受壓。老實講，如今個個禮拜香港都有社會衝突，商場關門避險，雖則話關門可以避免商舖資產受破壞，但每個月冇咗幾日本來係最高收入的營業日，長此下去啲商戶真係死得。最終要業主減租求存，否則都係長期關門居多，失業率升置業需求亦會冷卻，咁落去地產股又點會好？
再講，嚟緊十月政府公布施政報告，土地政策會係市場焦點，傳聞北方都係覺得要令地主讓利，方能平息社會紛爭。姑勿論呢個觀點係啱與唔啱，但既然地產業或成政策針對對象，呢段時間無謂同佢拉上關係，咪貪平撈貨。
有股友問，如果十月真係有股災，依家應該點部署。老實講，若然呢刻難得兩袖清風，就當然係繼續冇貨一身輕。若然有貨喺手，都算係穩陣組合，但有啲擔心市況大幅震盪，就可以買小量反向ETF睇門口。其他的，少做少錯，唔做唔錯。
古勝