絲絲講場：債王傳家之寶阿仔照賣

錯版郵票料值2652萬

眾所周知，格羅斯另一個身份係全球著名嘅郵票收藏家。據外媒報道，佢正試圖阻止Nick拍賣5枚一九一八年美國郵局印刷嘅「倒置的珍妮」（Inverted Jenny）郵票。如果呢套郵票按計劃喺本周五拍賣，可能拍到340萬美元（約2,652萬港元）嘅高價。

格羅斯聲稱喺大約七年前送咗啲「倒置的珍妮」郵票畀自己三個細路，並且話畀佢哋知呢啲郵票係無價之寶，唔可以出售，要作為遺產傳給佢嘅孫仔和孫女。

話說面值24美仙嘅「倒置的珍妮」，當年由於印刷錯誤，郵票上嘅「珍妮號」飛機就倒置咗。而印刷廠發現呢個錯誤後，錯版郵票全被銷毀，但偏偏有一版共100枚印刷倒置嘅郵票無被發現。而一枚狀況良好嘅「倒置的珍妮」郵票最高嘅拍賣紀錄超過150萬美元（約1,170萬港元）。

阿Nick依家正計劃透過拍賣行Spink出售一套四方聯（四枚郵票聯埋一齊），同一枚單張嘅「倒置的珍妮」郵票，並且否認債王曾限制佢哋出售呢啲郵票，又話從來無達成過咁嘅協議。佢仲話：「如果阿爸想攞番呢啲郵票，歡迎佢喺拍賣會上競投。」

余絲韻