絲絲講場：險企撐環保「跑數」兼「走塑」
保險經紀平時忙住「跑數」，保柏香港反而要求員工齊齊「走塑」！佢哋最近同環保機構合作，員工如果用公司環保餐盒，到附近指定食肆買外賣有折扣優惠。
美國長大嘅保柏香港業務及營銷總監孫瑩慧（Stella）最近同絲絲講起，美國人環保意識好強，甚至有人因關注全球暖化議題，而選擇成為素食主義者，相反香港人對環保似乎仍感到有啲陌生。
自攜餐盒 食飯有折
以保險企業來講，保柏本身有好多空間同資源履行環保責任，佢哋七月起為員工提供可重用餐盒借用服務。員工只要使用印有公司標誌嘅餐盒，到太古和鰂魚涌地區約十間合作食肆買外賣，就可以享有折扣優惠，不過要自行清洗餐盒，以便其他同事使用。
Stella話，當初打算用「優惠」攻勢先可以改變大家嘅習慣，點知有唔少同事即使去到無優惠嘅餐廳，都願意自備環保餐盒，證明只要慢慢向大家滲透環保意識，就能夠逐漸改變到香港人生活習慣。
咁有冇研究過點樣將環保元素融入保險產品？例如投保人參與環保工作有保費優惠？Stella笑言暫時未有計劃，想專注番醫保產品，又認為環保工作毋須強迫他人做，隨心所想就可以。
余絲韻