絲絲講場：大酒店唔開業績會有苦衷？
踏入八月，又迎來上市公司業績期，不過原本將喺今日公布中期業績嘅香港上海大酒店（00045），今年竟然選擇唔搞記者會。
憂交通兼逢CEO抱恙
大酒店發言人同絲絲講，係因為現年59歲嘅董事總經理兼行政總裁郭敬文（Clement）早排做咗眼部手術，需要抖一陣先決定唔出嚟見記者朋友，亦係集團有史以來第一次唔搞業績記招。
但係Clement唔出現，其他管理層都可以主持大局o架？原來集團係為咗記者着想。事關大酒店喺多個國際大城市擁有同經營10間半島酒店，自然每年都會揀喺自己主場、即係半島酒店舉行發布會。但發言人話，本港近日各區出現唔少示威活動，係為咗大家安全及交通安排先咁樣做。
不過，佢強調今次取消記招唔關集團曾發盈警事，料照常喺今日中午會公布業績。大酒店早前發盈警，預計截至六月底止中期盈利將比起一八年同期減少，主因係市況轉弱及市場有新客房供應，令香港、美國兩間酒店期內收入減少，另外山頂纜車今年四至七月進行升級工程而暫停服務都有影響等。
余絲韻