Market Insight：體品股內需概念夠撐

也許，七月底美國的議息結果，會是港股爆邊的一個觸發點，但如今距離月底都仲有幾個交易日，大家要繼續捱住悶市，恒指波幅暫不離兩萬八至兩萬九點的區間。

美圖倘回吐睇50天線

個股方面，昨日不得不提的當然是美圖公司（01357），股價急升近三成，收報2.62元，成交大增至2.19億元。股價異動，主要是有消息指旗下「魔法照片」在亞太市場反應甚佳。反正如今市場缺乏炒作題材，有人落疊就瞌埋眼衝，周一股價穿過2元，昨日一口氣突破50天線2.5元水平，都真係唔簡單，下一個較大的阻力位在2.7至2.8元水平，短線回吐須考驗50天線承接。

板塊方面，見體育用品股有異動，安踏體育（02020）升逾2%；特步國際（01368）升約8%、361度（01361）升逾4%。老實講，呢啲內需概念股，要炒幾時炒都得，唔需要太多理由。但當然，呢個市咁靜，要跟炒板塊，最好都係從具成交的個股下手，一旦有咩差池走貨都有得沽。好似昨日特步成交過億元，且圖表走勢展現突破，照計應該仲有一浸去，下一個目標睇5.7元，初步支持喺5元關，值得留意。

中煙翻炒重上20元關

同屬內需概念，藍籌恒安國際（01044）亦見異動，股價收報59.3元，升5.3%，成交4.4億元。走勢上，股價剛重上50日線，再上62元的阻力頗大，若短線再衝一浸便掉頭，建議把握機會落車，候回吐再留意翻兜機會。

淡市中要發掘炒作目標都唔難，昨日就見隻中煙香港（06055）翻炒，重上20元關，收報21.5元，升10%，成交逾六億元。照計能夠炒得番上去，而20元關都係一個幾大的關口，炒得番上去，證明之前的蟹貨區已一定程度消化，唔排除可以又再慢火煎魚向上炒。但當然，咁炒上去，冇得睇估值，純粹睇住啲資金流，人炒你炒，有智慧不如趁勢嗰隻，呢類相對高風險的操作，自問心血少，就行埋一邊睇戲好了。

此外，北京汽車集團入股戴姆勒（Daimler），現時持股量5%。北汽集團旗下在港上市的北京汽車（01958）股價昨日亦曾升上5.48元，收報5.19元，升2.7%。不過，內地汽車行業景氣尚不明朗，除非行業出現重大利好消息，否則暫不建議落場跟炒。

古勝