絲絲講場：全球首隻「犀牛債券」誕生
保育同金融大纜都扯唔埋？未必！事關投資者最快可以喺明年第一季投資全球首隻「犀牛債券」（Rhino Impact Bonds，簡稱RIB），幫助提升瀕臨絕種嘅黑犀牛數目。
規模3.9億 保護瀕危動物
呢隻債券嘅預期規模有成5,000萬美元（約3.9億港元），背後仲有瑞信、瑞銀等大行支持，更加會係全球第一隻致力保護瀕臨絕種動物嘅投資工具。
唔講唔知，原來黑犀牛數量由七十年代嘅65,000隻減少到依家約5,500隻，主要原因係佢哋長期受到偷獵犀牛角產品嘅非法貿易所威脅。為咗保育呢類黑犀牛而推出嘅「犀牛債券」，係一種為期五年嘅固定收益投資工具。即係如果肯尼亞、南非等五個地區的黑犀牛數量，喺呢五年內有所上升，債券投資者就可收番本金同利息。唔止咁，當黑犀牛數量增加得愈多，投資者得到嘅利息亦會愈多。
其實呢種債券嘅目標係要將全球黑犀牛嘅數量，喺五年之間提高10%，而屆時將會由獨立評估方去核實達唔達到個目標。「犀牛債券」成唔成功，分分鐘影響到之後會唔會再有類似嘅保育債券推出，絲絲真係好期待！
余絲韻