絲絲講場：股神天價飯局食唔到
邊個咁大膽，竟然放股神巴菲特飛機？咪就係以破紀錄456.78萬美元（約3,563萬港元），投得今年同股神一齊食餐晏晝飯嗰位中國九十後、波場幣（TRON）創始人孫宇晨囉！
股神巴菲特一年一度嘅世紀慈善午宴原本喺今個星期四（二十五日）進行，但係孫宇晨星期二清晨喺微博指，自己因為突發腎結石正喺醫院治療，所以要取消與股神嘅午餐會面。
不過，佢特別提到對於格萊德基金會（Glide Foundation）嘅捐贈已經完成，仍然有效。
或再安排時間補食
大家又唔使太擔心，佢話目前身體情況一切穩定，處於恢復期，無法接受採訪，等身體恢復後將會好快同外界見面。
佢又指，如果未來各方時間夾得到嘅話，將可以重新安排午餐，而孫宇晨邀請嘅客人亦將會喺重新安排嘅時間出席。
只係幾粒鐘後，代表佢嘅波場幣基金會就已經喺Twitter發文表示，雙方已同意重新安排午餐時間，但暫時未見巴菲特方面官方確認。
事有湊巧，喺本月初曾有消息傳出，巴菲特取消該午宴，但孫宇晨即刻喺微博澄清如常舉行。
而今次喺世紀飯局前兩天，佢又突然話因病取消，唔少內地網民議論紛紛，質疑佢炒作新聞，就連佢嘅好友之一，同樣嚟自幣圈嘅Primitive Ventures創始人Dovey Wan聯絡到臥病中嘅佢時，都話服咗佢囉！
波場幣即蒸發25億
今年28歲嘅孫宇晨，自從投得同股神食午餐後，炒作新聞多多，例如向股神提出更改午餐地點，由股神家鄉奧馬哈轉到三藩市嘅三星米芝蓮餐廳Quince進行，被指令股神失去主場之利，有利佢午餐時與一眾虛擬貨幣友人圍攻股神，游說佢老人家買虛擬貨幣。
之不過點都好，取消飯局對波場幣嘅價格就即時有影響，根據CryptoCompare報價，截至下午七時，波場幣單日下挫逾15%，報0.02449美元，最新市值16.3億美元，單日蒸發3.2億美元（約25億港元）。
余絲韻