絲絲講場：巨企CEO難撈去年437人被炒
羅兵咸永道戰略管理諮詢團隊最新嘅研究報告發現，去年全球市值最大嘅2,500間上市公司嘅CEO更替率達到17.5%，即係有成437名CEO執包袱，創下歷史新高，比起前年高出3個百分點。
近四成涉道德問題
絲絲仲發現到，因為道德失範而被炒嘅CEO比例上升到39%，而且仲係呢個研究首次出現，因道德失範被炒嘅CEO比例，高過因財務業績差或董事會鬥爭而炒嘅CEO。相對於前年，因道德失範而被炒嘅CEO比例約26%，即係按年升咗一半。
報告提及嘅道德失範，泛指CEO和僱員嘅醜聞或不當行為，例如欺詐、賄賂、內幕交易、破壞環境、履歷造假同埋性別歧視等等。總之係個人道德有問題啦，而絲絲睇到，喺近年經常都會爆出呢間，又或者嗰間大型上市公司嘅CEO被揭性騷擾下屬，又或者被爆有婚外情等等。之不過，個別CEO本身同時係公司嘅創辦人，正所謂大到不能炒啦！
通訊業換帥率最高
團隊喺過去十九年，一直研究全球最大嘅2,500間上市公司CEO嘅更替情況，結果顯示，在呢段日子裏頭，雖然CEO任期中位數為5年，但有19%嘅CEO做咗十年或以上。
舊年，除中國以外嘅所有地區嘅CEO更替率都有顯著上升，而所有行業中，通訊服務行業更替率最高，佔24.5%，其次係佔22.3%的材料行業，能源行業則佔19.7%。反而舊年醫療行業嘅CEO更替率最低，佔11.6%。
余絲韻