絲絲講場：恒發光學CEO敲鑼晒魔術

尋日總共有六隻新股齊齊首掛，場面都幾熱鬧，每間公司當然都想成為場中嘅焦點。當中眼鏡製造商恒發光學（01134）就高招喇，其公司行政總裁郭君宇（Ken）臨敲鑼前突然同大家表演個「魔術」，佢都唔知喺邊度變咗一副黑超出嚟，然後再戴住副超嚟敲鑼，個人除咗增添幾分明星味外，副超又襯晒公司業務喎！

不過，Ken都識做，同港交所（00388）行政總裁李小加及其他掛牌嘅公司管理層合照時，就除番副黑超尊重嘉賓。

嗱，不過講明先，變魔術話就話搞搞新意，但聯交所唔係乜都畀變！始終場地同場合關係，唔可以搞到其他人！

講開又講，六隻新股齊掛牌，聯交所收紀念品都收到手軟，絲絲印象較深係泰國IT解決方案提供商Platt Nera（01949），送咗代表泰國吉祥力量兼守護神嘅「彩繪大象」擺設！唔知又會唔會為近期經歷百威亞太事件嘅聯交所，帶嚟一啲好運呢？

至於搶晒風頭嘅恒發光學，又會送乜嘢紀念品呢？原來係另外一副黑超，睇嚟公司真係好鍾意黑超喎！

余絲韻