絲絲講場：銀聯一姐Plan定退休「樂」
BCT銀聯集團原來今年已成立20周年，喺集團做足廿年嘅CEO劉嘉時話，呢份係佢做得最長嘅一份工，大家都好關心佢幾時會退休。雖則佢無正面回應，但就透露咗少少風聲，得閒都會諗吓退休之後有咩搞，佢話自己對唱歌同音樂都好有興趣，仲係教會嘅詩班成員，退咗休之後就好想進修吓音樂課程，唔通暗示離退休日子不遠？
自爆凌晨搵同事做嘢
身居要職嘅嘉時其實幾貼地，自己最鍾意行吓香港嘅街邊小店，話要保留本地特色同支持小店嘅生存空間，甚至買支牙膏佢都會揀喺小店買，仲唔會假手於人，怕人哋唔知佢鍾意嘅味道喎。佢又自爆會喺凌晨兩三點搵同事做嘢，不過佢唔預同事會應機，只係驚自己第日會唔記得。
望積金投資規限鬆綁
講開退休，佢話呢輪積金局同業界傾緊，點樣可以幫強積金成員諗多啲退休投資方案，但係現時嘅強積金條例之下，有唔少投資規限，例如喺房地產投資、基建項目投資上都有唔同掣肘，業界希望投資限制上可以有所放鬆，希望積金局可以提供有關指引，未來可引入外國提取收益基金等，令到計劃成員有更多退休投資產品選擇，同時希望明年有關產品可逐步出台。
自從可扣稅自願性供款（TVC）喺四月推出後，BCT銀聯已收到超過6,000個查詢，而開戶人數已經有1,000個，平均戶口供款有2萬至3萬元，有八成都係現有客戶，成績都唔錯。
余絲韻