絲絲講場：反傳統巴菲特慈善午餐轉場
以破紀錄成交價投得巴菲特慈善午餐嘅虛擬貨幣Tronix（TRX，又稱波場幣）創辦人孫宇晨（Justin），喺其個人Twitter發文話，將於七月二十五日與「股神」巴菲特喺美國三藩市嘅米芝蓮三星餐廳Quince共進午餐。
食米芝蓮三星餐廳
過去十四年來，巴菲特慈善午餐一直選址喺曼哈頓嘅Smith & Wollensky，今次竟然一反傳統，轉食米芝蓮三星餐廳。
而今年28歲嘅孫宇晨打算喺午餐時向89歲嘅股神親述，佢喺二○一七年創立嘅波場幣嘅真正投資價值。而一向無投資虛擬貨幣嘅股神一早已經氣定神閒地表明會奉陪。
巴菲特慈善午餐今年嘅拍賣成交價再創歷史新高，高達456.78萬美元（約3,562萬港元）。活動已經係第二十屆，中標者可攜帶最多七名朋友同巴菲特共進午餐。
之不過，孫宇晨現時只透露請到一個好友，萊特幣（Litecoin，LTC）創始人李啟威答應陪佢赴宴。睇嚟Justin要加倍努力，向幣圈界招手囉！
余絲韻