絲絲講場：辦公室搬牛頭角唔熟路 新股女王嘆「難搵食」
新股女王卓佳商務部董事總經理鍾絳虹一直以來都係「港島人」，家住南區，辦公室多年都喺灣仔合和中心，身為「新股女王」嘅佢，更加經常出入中環、金鐘一帶，同賓架、律師等開會。
不過，最近佢搖身一變成為「東九龍人」，事關佢公司由今個星期開始，搬咗去牛頭角新落成嘅國際貿易中心。
日日捱麵包解決
「女王」坦言一世女都未去過牛頭角，初來埗到做「開荒牛」，真係人生路不熟，返工首日仲迷路，要急Call同事帶路。不過，最「攞命」都係商廈剛入伙半年，附近食肆未開齊，暫時只有一間連鎖式S字頭咖啡店，同附近有一家大型茶餐廳。佢慨嘆依家日日三餐都喺咖啡店食麵包解決。
佢仲話，公司有成六百幾個員工，暫時只係搬咗部分同事過嚟牛頭角，仲有300幾人未搬嚟，到全部人搬晒過嚟時，到時嗰間咖啡店同茶餐廳肯定逼爆添。
游說太興開新舖
曾經協助太興上市嘅佢靈機一觸，趁同客戶開會時，就落足嘴頭希望太興高層可以考慮喺牛頭角開店，不過，原來太興喺該區附近已有3家分店，所以「女王」暫時只可繼續食包做午餐囉！
余絲韻