Market Insight：手機股要盡快疏散

中國上周公布的五月份官方製造業PMI跌至49.4，失守盛衰分界線。走資潮預料將持續打擊製造業及就業市場。

貿戰隨時變持久戰

事實上，恒指整個五月最多唔見逾三千點，「五窮」而言都算係「極窮」。老古相信，港股「六絕」將會體現於指數表現、成交和中美關係上，六月底中美能達成貿易協議的機會少於五成，失敗可能性較大。若然雙方拖住拖住，未反面還好；若然係反面並互相進行報復，咁大家就真係仲有排愁！

做最壞打算，若然中美未能達成協議，並反面收場，中國沒有必要再保持緘默，則美企在華的發展，必然會成為被「修理」的對象。就如蘋果公司在華業務，將存在重大不明朗因素。故在下再次重申，手機設備股仲未撈得貨，有貨就要把握逢反彈減磅機會。畢竟呢類股處於暴風的中心，長期折磨下去，真係好難估底。

地產股可小注追沽

另一個要有心理準備的，就係嚟緊中、港經濟都會顯著轉差，亦不排除美國將戰線伸延至金融領域，並將香港納入制裁名單中。老實講，回歸廿多年，香港都算是有驚無險。可若然中國經濟都危危乎，香港頓失所靠，莫說傳統金融、地產、旅遊及零售景氣無以為繼，近幾年一直說要推動創新科技發展的戰略，亦會受到中國製造業不景所累，總之萬事皆難。在這個背景之下，若然大家仍堅信香港樓價只會升不會跌，老古亦無言。上周五本地地產股的跌勢之急，也許在說明部分資金已採取行動應對風險。照計呢啲位，地產股仍有充裕的做淡空間，可以留意小注追沽的機會。

為免股債齊冧，相信內地官方將繼續推出刺激經濟措施。若然仍有資金留在魚缸，建議短炒焦點盡量放在潛在受益股，免得藥石亂投，浪費銀彈。上周，汽車和保險股都有利好政策支持，相信內銀都係排隊等緊打救之列，會唔會係降準、減稅之類，不妨等着瞧。

見到上周北水仍在積極買入內銀股，否則國企指數萬點關可能已不保。之不過，筆者不建議買內銀股，皆因沒有信心在極端波動下，人民幣能夠「保七」，都係集中眼光喺新能源汽車及家電股身上，且最好喺跌市時才吼位低吸，夠水位炒上落已心滿意足，其他的就一於唔做唔錯。

古勝