絲絲講場：優品試食會 伙記奉旨中伏
休閒食品連鎖店優品360（02360）行政總裁許志群（Peter）話，公司差唔多每一至兩星期搞一次產品試食會，每次試20至30款產品，不過留低嘅只有三至四成。係名副其實嘅「試伏會」，明知要中伏都密密搞，只為咗每月有50至60款新產品帶畀消費者！
4評分準則揀貨
邊個係試食員？咪就係公司採購部、市場部、營運部等約10名員工。Peter除咗出差，基本上都會坐鎮試食大會，重申「伏留番畀公司中」嘅原則。
「試伏會」基本有4項評分準則， 包括味道、價錢、容量及包裝，1分最低，3分就最高，平均分多過2分先叫合格。Peter仲話，「樣衰」唔係死罪，因為容量同包裝可以同廠方「傾吓改良」。咁咩先係致命傷？味道同價錢！事關呢兩項因素可議空間較小，亦係吸引消費者長遠幫襯嘅元素。
Peter透露，嚟緊公司會迎合潮流嚟採購產品，例如健康有營產品、創新口味、選用新穎特別材料配搭等食品。今年就會嘗試發掘香港製造嘅特色產品，希望將香港製造介紹畀世界各地嘅客人。
余絲韻